.jpg)
Украины дайны нэг жилийн ойтой давхцуулан баримтат кино бүтээх даалгаврыг ОХУ-ын ерөнхийлөгч Владимир Путин тус улсын соёлын яаманд өгсөн байна.
Өчигдөр Кремлийн хэвлэлийн албанаас гаргасан мэдэгдэлд Путин “цэргийн тусгай ажиллагаанд оролцогчдын баатарлаг үйлс”-ийн талаар баримтат кино бүтээх хүсэлтэй уран бүтээлчдэд дэмжлэг үзүүлж, хамтран ажиллахыг батлан хамгаалах яамандаа бас даалгажээ.
Энэ чиглэлд ямар ажил хийснээ гуравдугаар сарын 1-нд тайлагнахыг батлан хамгаалахын сайд Сергей Шойгуд үүрэг болгосон байна.
Өнгөрсөн оны хоёрдугаар сарын 24-ний өдөр тэрбээр хөрш Украины нутаг дэвсгэрт “денацификация”, “демилитаризация” буюу нацизм, зэр зэвсгээс ангижруулах ажиллагаа явуулах нэрээр цэргээ оруулж, дайн өдөөсөн нь өнөөдөр 11 дэх сардаа үргэлжилж байгаа.
Энэ хугацаанд Москвагийн эрх баригчид Украинд болж буй үйл явдлын талаар зөвхөн төрийн өмчийн мэдээллийн хэрэгслүүдээр цацаж, хараат бус хэрэгслүүдийн үйл ажиллагааг хориглож байв.
Украины дайныг шүүмжилсэн, уг үйл явдлыг “дайн”, “эзлэн түрэмгийлэл” гэж нэрлэсэн хүмүүст хатуу шийтгэл оноох хуулийг бас баталсан юм.
Эх сурвалж: The Moscow Times
