Тээврийн цагдаагийн албанаас цагаан сарын баярын өдрүүд ойртсонтой холбоотойгоор зах, худалдааны төвийг чиглэсэн замын хөдөлгөөн нэмэгдэж байгааг анхаарууллаа. Дээр нь нэмээд хичээл эхэлсэн учраас замын түгжрэл бүр их байна гэв.
Уг нь замын хөдөлгөөний түгжрэлийг бууруулах зорилготой бүтэн нэг сар тэгш, сондгой дугаараар автомашиныг хөдөлгөөнд оруулсан. Ингэснээр замын хөдөлгөөний ачаалал 35 хувиар буурсан гэж албаныхан хэлж байсан.
Гэвч цагаан сар дөхөж байгаа энэ өдрүүдэд авто замын ачааллыг тооцоолохгүйгээр дугаарын хязгаарлалтаа цуцалж, хуучин хэвэнд нь оруулсан. Иргэдээс санал авахад ихэнх нь буюу 60 хувь нь тэгш сондгойг дэмжээгүй гэх. Ингэснээр өчигдрөөс хуучин журмаар буюу 1,6, 2,7, 3,8 гэдэг 4,9, 5,0 дугаараар тодорхой өдөр хуваарийн дагуу тээврийн хэрэгсэлтэй иргэд хөдөлгөөнд оролцож байгаа.
Тэгш, сондгойгоор зорчуулж байхад өдөрт 250-270 мянган тээврийн хэрэгсэл хөдөлгөөнд оролцож байсан. Харин амралтын өдрүүдэд энэ зохицуулалт үйлчлэхгүй байсан бөгөөд 400 мянга гаруй тээврийн хэрэгсэл хөдөлгөөнд оролцож, тэг зогсоход хүрч байсан аж.
Тиймээс баярын өдрүүдэд буюу ойрын өдрүүдэд замын хөдөлгөөний ачаалал эрс нэмэгдэж, тэг зогсолт болно шүү гэдгийг Тээврийн цагдаагийн албанаас анхааруулсаар байна.
