Мэргэжлийн холимог тулааны "ONE FC" холбооны "Fight Night 29" өдөрлөг өнөөдөр/2025.03.08/ эхэллээ. Нийт 11 тулаан болох бөгөөд үүний дотор монгол тулаанч Б.Энх-Оргил тулалдсан. Түүний хувьд Филиппинийн тулаанч Жереми Пакативтай тулалдаж, гурван үеийн эцэст шүүгчдийн нэгдсэн шийдвэрээр ялалт байгууллаа.
Өдгөө 36 настай, гавьяат тамирчин Ж.Нарантунгалагийн шавь тэрбээр "ONE FC" холбоонд долоон тулаан хийн, зургаа ялсан үзүүлэлттэй боллоо. Үүнээс гурав дараалан ялав.
Б.Энх-Оргил "Road to ONE: Mongolia" шоунд ялж, 100 мянган ам.долларын гэрээ байгуулах эрхийн эзэн болсон түүхтэй.
Энэ өдрийн оргил тулаан эмэгтэйчүүдийн муай тай боксын хөнгөн жингийн аварга Хеллен Родригес болон Марье МакМанамон нарын хооронд болох учиртай. "ONE FC" холбоо ч олон улсын эмэгтэйчүүдийн эрхийн хамгаалах өдрийг тохиолдуулан энэхүү тулааныг товложээ.
