Украины Ерөнхийлөгч В.Зеленский өөрийн сошиал хуудастаа өнгөрсөн шөнө Оросын арми Донецк мужийн Добропилля хотын төвд хоёр баллистик пуужингаар цохилт өгсөн тухай бичжээ. Тодруулбал тэрээр: "Манай онцгой байдлынхан цохилт өгсөн газарт очсоны дараа дахин цохилт өгч, аврагчдыг зориуд онилсон. Энэ бол оросуудын байнга хэрэглэдэг бусармаг, хүнлэг бус айлган сүрдүүлэх арга юм.
Харамсалтай нь энэ мөчид 11 хүн нас барсан нь тогтоогдоод байна.
Тэдний гэр бүл, ойр дотны хүмүүст нь эмгэнэл илэрхийлье. 30 гаруй хүн гэмтэж бэртсэний 5 нь хүүхэд байжээ. Таван давхар найман орон сууцны барилга, захиргааны байгууламж, гал унтраах машин эвдэрсэн байна.
Энэ үйл явдал нь Оросын зорилго өөрчлөгдөөгүйг харуулж байна. Тиймээс хүний амь насыг хамгаалах, агаарын довтолгооноос хамгаалах хүчээ бэхжүүлэх, Оросын эсрэг хориг арга хэмжээг нэмэгдүүлэхийн тулд чадах бүхнээ хийх нь нэн чухал юм. Путинд дайныг санхүүжүүлэхэд тусалдаг бүх зүйл нурах ёстой." гэсэн байна.
Н.Отгон
