УИХ-ын гишүүн асан Б.Энх-Амгалан Зам, тээврийн хөгжлийн сайдаар ажиллаж байхдаа УИХ-ын дарга асан З.Энхболдын хамаарал бүхий “Страто”, “Их дэлгэмэл ингүүн” ХХК-аас их хэмжээний авлига авч, хариуд нь тус хоёр компанид Цогтцэций-Чойр чиглэлийн 407 км замыг эзэмшүүлэх тушаал гаргасан буюу “Нүүрсний хулгай”-н хэрэгт хамтрагчаар оролцсон хэрэгт шалгагдаж байлаа.

Улмаар УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох хэргийн анхан шатны шүүх хурал өнгөрсөн баасан гарагт Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд болсон юм. Шүүхээс шүүгдэгч Б.Энх-Амгалан, З.Энхболд нарыг гэм буруутайд тооцож нийтийн албанд томилогдох эрхийг таван жилээр хасаж, хоёр жилийн хорих ялыг тус тус оноолоо. Хорих ялыг нээлттэй хорих ангид эдлүүлнэ. Түүнлэн шүүгдэгч Б.Энх-Амгалангийн нийтийн албанд томилогдох эрхийг таван жилээр хасах ялыг хорих ял эдэлж дууссаны дараанаас эхлэн тооцно. Мөн шүүгдэгчдийн Монгол Улсын хилээр гарах хязгаарлалтын арга хэмжээг хүчингүй болгож, цагдан хорих ялыг нь тухайн өдрөөс тооцож эхлэхээр шийдвэрлэсэн билээ. Тэгвэл шүүхээс хоёр жилийн ял сонссон УИХ-ын гишүүн асан Б.Энх-Амгалан УИХ-ын дарга асан З.Энхболд нарын холбогдсон хэргийн дэлгэрэнгүй баримтыг хүргэж байна.

Тодруулбал, Зам, тээврийн хөгжлийн сайд асан Б.Энх-амгалан 2019 оны тавдугаар сарын 3-нд авто замын ангилал шилжүүлэх тухай 134 дугаартай тушаал гаргаж, Цогтцэций-Чойр чиглэлийн 407 км шороон замыг улсын чанартай авто замын статустай болгож шийдвэрлэсэн. Улмаар хоёр сарын дараа буюу 2019 оны долдугаар сарын 1-ний өдөр дахин “Улсын чанартай авто замыг эзэмшүүлэх тухай” 227 дугаартай тушаал гаргаж, Цогтцэций-Чойр чиглэлийн 407 км шороон замыг “Их дэлгэмэл ингүүн” ХХК-д эзэмшүүлэхээр шийдвэрлэсэн байдаг. Өөрөөр хэлбэл, Б.Энх-Амгалан Зам, тээврийн хөгжлийн сайдын эрх мэдлээ урвуулан ашиглаж Цогтцэций-Чойр чиглэлийн 407 км шороон замыг улсын чанартай авто замын статустай болгосон. Хуульд зааснаар хатуу хучилттай авто зам улсын чанартай авто зам ангилалд хамааруулах ёстой байтал Б.Энх-Амгалан шороон замыг улсын чанартай авто зам ангилалд оруулж хууль зөрчсөн. Улмаар улсын чанартай авто зам ангилалд оруулсан Цогтцэций-Чойр чиглэлийн 407 км шороон замыг “Их дэлгэмэл ингүүн” ХХК-д эзэмшүүлэх тушаал гаргасан байгаа юм.

Б.Энх-Амгалан ингэж хууль зөрчин байж Цогтцэций-Чойр чиглэлийн 407 км шороон замыг улсын чанартай авто зам болгох болон “Их дэлгэмэл ингүүн” ХХК-д эзэмшүүлэх хоёр тушаал гаргасны учир нь, УИХ-ын дарга асан З.Энхболдын хамаарал бүхий “Страто” ХХК нь Говьсүмбэр аймгийн Шивээговь сум буюу Чойрт нүүрс угаах үйлдвэр барьсан. Харин угаах нүүрсээ Өмнөговь аймгийн Цогтцэций суманд байх “Эрдэнэс тавантолгой” ХК-аас худалдаж авдаг. “Эрдэнэс тавантолгой” ХК-аас “Страто” ХХК-ийн үйлдвэр хүртэл нүүрс тээврийн ажлыг З.Энхболдын хамаарал бүхий “Их дэлгэмэл ингүүн” ХХК хариуцдаг. Өөрөөр хэлбэл, Б.Энх-Амгалан Зам, тээврийн хөгжлийн сайдын албан тушаалаа ашиглаж З.Энхболдыг хамаарал бүхий “Страто” ХХК, “Их дэлгэмэл ингүүн” ХХК-уудад “Эрдэнэс тавантолгой” ХК-аас нүүрс зөөх замыг нь бэлдэж өгсөн байгаа юм.

Цаашилбал, Б.Энх-Амгалан ХОМ-тээ “Мандал хүдэр”, “Говь-алтайн мааньт” ХХК-д хувь эзэмшдэг гэж дурдсан. Тэгвэл “Мандал хүдэр” ХХК нь Говь-Алтай аймгийн Төгрөг сумын нутагт байрлах Мааньт гэх нүүрсний уурхай, Говь-Алтай аймгийн Дэлгэр сумын нутагт байрлах Хөв булагийн нүүрсний уурхайг тус тус эзэмшдэг.