Нийгэм / 2017/12/13

ШИНЭ ЖИЛИЙН ҮЗВЭРҮҮД



Шинэ он гарахад 20 хүрэхгүй хоногийн хугацаа үлдээд байна. Хотын гудамжинд баярын уур амьсгал хэдийнэ орж, шар, цэнхэр, улаан, цагаан өнгийн гэрлүүд нүд гялбуулан алаглаж, энд тэндгүй гоёл чимгээ зүүсэн гацуур моднууд засчээ.

Тэгвэл эдгээр өдрүүдэд уншигч та шинэ жилийн уур амьсгалыг мэдрүүлсэн ямар үзвэр үзэж болох вэ? Энэ талаарх дэлгэрэнгүй мэдээллийг хүргэж байна.


 

MOVIE NIGHT: CHRISTMAS WITH THE KRANKS

 

Хаана:  Америкийн Соёл Мэдээллийн төвийн Уншлагын танхимд

Хэзээ: 12 сарын 13-ны 17:00 цагт

Тасалбар: Үнэ төлбөргүй

Дэлгэрэнгүй мэдээлэл: Кино үдэш хөтөлбөрийн хүрээнд Шинэ жилийн баярын уур амьсгалыг мэдрүүлэх кинонуудаас хүргэж эхэллээ. Эхний киногоор Америкийн инээдмийн төрлийн “Christmas with the Kranks " киног толилуулах гэж байна. Энэхүү хөтөлбөр нь англи хэл суралцагсдад зориулагдсан ба баримтат болон уран сайхны кинонуудыг англи хадмалтайгаар хүргэдэг юм.


“МОНГОЛ УЛСЫН ФИЛАРМОНИ-45” БАЯРЫН КОНЦЕРТ


Хаана: Соёлын төв өргөө

Хэзээ: 12 дугаар сарын 15-ны  19:00 цагт

Тасалбар: 20.000-40.000 төгрөг

Дэлгэрэнгүй мэдээлэл: Монголын хөгжмийн урлагийн хамгийн том байгууллага болох Монгол улсын Филармони нь 1972 онд байгуулагдсан ба тус оны 10 дугаар сарын 25-нд Улсын хөгжимт драматик /дуурь бүжгийн/ театрт нээлтийн тоглолтоо хийж байсан түүхэн цагаас хойш 45 дахь уран бүтээлийн жилтэйгээ золгоод байна. Бүрэлдэхүүндээ Симфони найрал хөгжим, Баянмонгол жазз найрал хөгжим, Морин хуурын чуулга, дуучид гээд 160 гаруй уран бүтээлчдийг багтаасан Улсын Филармони ойн баярын концертоо Соёлын Төв Өргөөнд зохион байгуулах гэж байна.

"Монгол Улсын Филармони-45" баярын концерт нь өвөрмөц дуугаралт, гайхамшигтай орчин, шинэ хэв маягийн тайз засалт мэргэжлийн уран бүтээлчдийн сэтгэл сэргээм тансаг хөг аялгууг танд мэдрүүлж, мартагдашгүй дурсамжыг үлдээх болно. Өөр өөр, төрөл жанр, дуугаралт бүхий мэргэжлийн 180 гаруй гаруй уран бүтээлчид нэгэн тайзнаа цуглана.
 

“WINTER SNOW” ШОУ ТОГЛОЛТ


Хаана: The Corporate Hotel & Convention Centre

Хэзээ: 12 дугаар сарын 15, 16-ны 19.00 цагт

Тасалбар: 30.000 төгрөг

Дэлгэрэнгүй мэдээлэл:  “Өвөл” шоу тоглолт энэ сарын 15, 16-ны өдрүүдэд “Корпорэйт” зочид буудлын концертын танхимд болно. “Корпорэйт энтертаймент' нь урлагийн салбар бүрээс уран бүтээлчдийг сонгон шалгаруулж, Монгол үндэстний өв соёлоо шингээсэн урлагийн бүтээл, уран бүтээлчдийн бүтээлийг орчин цагийн хэлбэрт найруулан дэглэж олон түмэнд хүргэх гол зорилготой аж.


“ВЕНИЙН ВАЛЬС 2017” ҮДЭШЛЭГ

 

Хаана: Шангри-Ла Зочид буудал

Хэзээ: 12 дугаар сарын 15-ны  18.00 цагт

Тасалбар: 275.000 – 375.000 төгрөг

Дэлгэрэнгүй мэдээлэл: Австри Улсын Өргөмжит Консулын газар, Монгол-Австрийн Найрамдлын Нийгэмлэг хамтран "Венийн вальс" цэнгүүнийг Шангрила зочид буудалд зохион байгуулах гэж байна. Цэнгүүнд урлаг соёлын алдартнууд болон Австри улсын элчин сайдын яам, Австри улсын Аж Үйлдвэрийн Танхим, Вена болон Улаанбаатар хотын захиргаа, Бизнесийн дэмжигчид оролцоно.
Мөн 32 бүжигчин ёслолын вальсаар арга хэмжээг хүндэтгэлтэйгээр нээж хүрэлцэн ирсэн зочид ч мөн тэдэнтэй хамтдаа бүжиглэн цэнгэж өвөрмөц шагналын эзэн болох боломжтой.
 


БАЛЕТЫН ГАЛА ТОГЛОЛТ


Хаана: Улсын Дуурь Бүжгийн Эрдмийн Театр

Хэзээ: 12 дугаар сарын 16-ны 17.00 цагт

Тасалбар: 10.000 – 20.000 төгрөг

Дэлгэрэнгүй мэдээлэл: Улсын дуурь, бүжгийн эрдмийн театрын уран бүтээлчид “Балетын гала тоглолт”-оор үзэгчдэдээ бэлэг барих гэж байна. Тус театрын хамт олон энэ өвлийн 12 дугаар сарын тоглолтын хөтөлбөрөө гаргаад байгаа бөгөөд хөтөлбөрийн нэгэн онцлох тоглолт бол балетын гала тоглолт юм.

 
WALT DISNEY МОНГОЛД


Хаана: Ulaanbaatar Palace

Хэзээ: 12 дугаар сарын 21-ны 14.00 цагт

Тасалбар: 15.000 төгрөг

Дэлгэрэнгүй мэдээлэл: Walt Disney Монгол тоглолтыг үзсэн хүүхэд бүхэн өвлийн өвгөн ааваас шинэ жилийн бэлэг авна. Мөн үлгэрийн баатруудтай дурсгалын зургаа татуулах боломжтой. Тоглолтод урилгаар бяцхан дуучин Энжи оролцоно.
 

П.И.ЧАЙКОВСКИЙ “ЩЕЛКУНЧИК”


Хаана: Улсын Дуурь Бүжгийн Эрдмийн Театр

Хэзээ: 12 дугаар сарын 21-24

Тасалбар: 20.000-40.0000 төгрөг

Дэлгэрэнгүй мэдээлэл: П.И.Чайковскийн "Щелкунчик" балет нь анх 1892 онд Петербургийн Мариинский театрт үзэгчдийн хүртээл болж байжээ. Зохиолч Мариус Петипа Э.Т.А.Хоффманы "Цөмөөхэй ба Хулганы хаан" зохиолоос сэдэвлэн цомнолыг бичсэн бөгөөд барууны улсуудад 1940-өөд оноос тоглогдож эхэлсэн тус балетын жүжиг нь зул сарын баяраар хамгийн олон удаа тоглогддог оргил бүтээл юм. Америкийн томоохон балетын компаниуд жилийн орлогынхоо 40 хувийг энэхүү балетын жүжгээр олдог байна.

Жүжгийн үйл явдал 18-р зууны сүүл үеийн Германы жижигхэн хотод зул сарын баяраа тэмдэглэж буй нэгэн гэр бүлд өрнөдөг. Хүүхэд бүрийн хүндэтгэн хайрладаг хүүхэлдэйн алдарт мастер Дроссельмейер өөрийн хийсэн хөдөлгөөнт хүүхэлдэйнүүдээр хүүхдүүдэд үлгэр ярьж өгөн, үлгэрийн баатар Цөмөөхэй буюу"Щелкунчик"-ийг Маша охинд өгнө. Маша охинд самар цөмөгч хүүхэлдэйн тухай шидэт үлгэр маш гүн сэтгэгдэл төрүүлсэн учир охины зүүд нь "Щелкунчик" бүжгэн жүжгийн үйл явдал болж өрнөдөг.
 

МОРИН ХУУРЫН ЧУУЛГА “ШИНЭ ЖИЛИЙН ТОГЛОЛТ”

 

Хаана: Тусгаар тогтнолын ордон

Хэзээ: 12 дугаар сарын 24

Тасалбар: 30.000-50.000 төгрөг

Дэлгэрэнгүй мэдээлэл: Морин хуурын чуулгын жил бүр уламжлал болон тоглогддог шинэ жилийн тоглолт ганцхан удаа тоглогдох гэж байна. Тоглолтонд дэлхийн вальсийн хаан И.Штраус, Оросын суут хөгжмийн зохиолч П.И.Чайковский, Чехийн алдарт хөгжмийн зохиолч А.Дворжак зэрэг сонгодог үеийн төлөөллүүдийн гайхамшигт аялгуунууд эгшиглэхээс гадна орчин цагийн хөгжмийн шилмэл бүтээлүүд тоглогдох болно.
 

“АЛДАГДСАН САНТА” ҮДЭШЛЭГ


Хаана: Hub Function bar

Хэзээ: 12 дугаар сарын 25-ны 19:00 цагт

Тасалбар: таксгүй

Дэлгэрэнгүй мэдээлэл: Жил бүр уламжлал болон зохиогддог “Алдагдсан Санта” хэмээх жилийн арга хэмжээнд хүн бүхэн оролцох боломжтой ажээ. Мөн цөөн ажилчидтай байгууллага, найзууд энэ  баярын үдэшлэг нэн тохиромжтой. Баярын үдэшлэг нь таксгүй бөгөөд хөтлөгч, дижи, дуучин гэх мэт хөтөлбөрүүдийг бэлдэх болно.


“ЦӨМӨӨХЭЙ БАЛЕТ” 2017


Хаана: Улсын Дуурь Бүжгийн Эрдмийн Театр

Хэзээ: 12 дугаар сарын 28-30

Тасалбар: 20.000-60.000 төгрөг

Дэлгэрэнгүй мэдээлэл: Монголын балетын хөгжил сангаас дөрөв дэх жилдээ зохион байгуулж буй 'Цөмөөхэй' балет бүжгэн жүжиг үзэгчдийн хүртээл болох гэж байна. Гавьяат жүжигчин, Соёлын элч Д.Алтанхуяг тэргүүтэй уран бүтээлчид “Цөмөөхэй” балетын тавилтыг жил бүр шинэчлэн хүргэдэг билээ. Цөмөөхэй балетад Клара ба түүний найзууд ,сахиусан тэнгэр зэрэг дүрүүдэд 200 гаруй хүүхэд оролцох гэнэ. Мөн АНУ-ын  'Aмеrican ballet theater'-ын бүжигчин Зинь Зжанг урилгаар “Цөмөөхэй” балетад бүжнэ.