“Нагоми”-д анзааргагүйгээс хэдэн хүн жоомоор хооллосныг таах аргагүй


Хүмүүст идэж ууж буй зүйлс нь хоол болохоосоо хор болох нь ч бий. Сүүлийн жилүүдэд зарим зоогийн газар, дэлгүүрийн хүнсний бүтээгдэхүүнээс хүний биед хортой элдэв янзын юм гарч бухимдуулдаг болоод байна.  Жишээлэхэд, нийслэлийн Хан-Уул дүүргийн нутаг дэвсгэрт байрладаг KFC сүлжээ рестораны Зайсан дахь салбараар үйлчлүүлсэн 80 гаруй хүн хордож, тэдний хүүүхэд голцуу 20 гаруй нь эмнэлэгт хэвтэн эмчлүүлж байв.  Мөн энэ оны гуравдугаар сард ТЭСО корпорацийн салваж зардаг “Слава” нэртэй будаанаас  үхсэн хулгана хүртэл илэрч олон түмнийг цочирдуулж байлаа. Энэ бүхэнд мэргэжлийн хяналтынхан тухайн үед нь анхаарч арга хэмжээ авсан гэх боловч байдал төдийлөн дээрдээгүй ажээ.

Саяхан Таван богд группын охин компани “Таван богд Вашёкү” ХХК-ийн мэдлийн “Нагоми” ресторанаар үйлчлүүлсэн  Ч.Батзул гэдэг хүн өөрийн цахим хуудсаар дамжуулан нэгэн ноцтой мэдээлэл түгээв. Тэрбээр “Ширээ олдохгүй, байнга урьд нь утсаар захиалдаг Төрийн ордны зүүн талын Нагоми-оос дөгнөж сая ийм юм гарлаа. Өдрийн цайны цагаараа байнга ордог байсныг яанаа. Ёстой дотор хутгалдаж, бөөлжис хүрч байна. Нагоми руу дахиж хэзээ ч орохгүй. Та нар ч бас сайн анхаараарай.  Мэргэжлийн хяналтын газрынхан бас эднийхнийг шалгаарай. Юу ч чанаад, юу ч идээд байсан юм” гэжээ. 

Япон хоолоор үйлчилдэг Нагоми хэмээх рестораны хоолонд жоом зэрэг баахан шавьж хорхой язганаж байсныг тэр тийнхүү бичсэн байна. Уг шавьжуудыг түүнээс өөр хүмүүс анзааралгүй идсэн байхыг хэн ч үгүйсгэх аргагүй юм. Энэ тухай судалгаа, тооцоо, хяналт алга байна. Нэг таваг хоолноос тийм их шавьж илэрсэн бол бусад хүмүүсийн аягатай хоолонд өнөөх шавьж хорхойнуудаас ганц хоёроороо орсон л байж таарна. Иймд “Нагоми”-д анзааргагүйгээс хэдэн хүн жоомоор хооллосныг таах аргагүй. 

Жоом гэгч хорхой бохир орчинд маш олноороо өсөж үрждэг бөгөөд иймэрхүү шавьж хорхойг устгаж ариун цэврийн наад захыг дэг журам сахиж чаддаггүй хоолны газруудыг хаах ёстой. Гэвч мэргэжлийн хяналтныхнаас ийм дорвитой арга хэмжээ авах нь бараг үгүй тул “Нагоми” мэтийнх нь эзэд улам давраад,  жоомоо үржүүлж, хоолондоо хачир болгож хийгээд байдаг юм байна.  Мэргэжлийн хяналтынхан шийдвэртэй арга хэмжээ авахгүй иймэрхүү ноцтой үзэгдэл хаа сайгүй үргэлжилсээр байх ажээ. 

О.Баяр

Шуурхай.мн 

 

 

  

 


Энэ мэдээ таалагдаж байвал: