“Ододтой бүжиглэе” шоуны ялагч Б.Баттөр шагналын мөнгөөрөө байгуулсан бие хамгаалах тулааны урлагийн Жюү Жицү клубээ “Өнөр бүл” төвд нээлээ.
Тодруулбал, Б.Баттөр өөрийн шагнал болох 50 сая төгрөгийг НҮБ-ын Хүүхдийн санд хандивласан билээ. Тэрбээр өнөөдөр НҮБ-ын Хүүхдийн сантай хамтран Жюү Жицү бэлтгэлийн танхим, иж бүрэн тоноглол, хувцас хэрэгслийн хамт Жюү жицү Холбооны дэмжлэгтэйгээр хүүхдийн асрамж, халамжийн "Өнөр бүл" төвд хүлээлгэн өгөв.
“Ододтой бүжиглэе” шоуны ялагч Б.Баттөр "Сэтгэгдэл маш өндөр байна. НҮБ-ын хамт олон болон бусад хүмүүстээ талархлаа. Бидний хүсэл зорилго таарсан учраас энэ ажил хамгийн зөв цагтаа нээгдэж байх шиг байна. Миний зүгээс шагналаа хандивлаж оролцсондоо маш их баяртай байна.
Мөн Болд-Эрдэнэ ахдаа тусгайлан баяр хүргэе. Монголын Жюү Жицү холбоо ямар их хүчтэйг харуулж чадлаа. Өнөөдөр энэхүү клубийн нээлтийг Олимпын нээлтийн өдөртэй давхцуулж хийсний учир нь энэ заалнаас ирээдүйн олимп, дэлхийн аварга төрөөсэй гэж бэлгэдсэн.
Хүүхэд бол бидний ирээдүй. Дүү нартаа хандаж хэлэхэд ах нь энэ заалнаас холдохгүй. Чадах чинээгээрээ энэ зааланд ирж, та бүхэнтэйгээ бэлтгэл хийж байх болно. Та бүхэн хэзээ ч битгий шантраарай. Би амьдралдаа олон зүйлийг ганцаараа туулж байсан учраас та бүхнийг хамгийн сайн ойлгох ах нь байх болно гэдгийг хэлмээр байна" гэв.
