УИХ-ын өнөөдрийн чуулганаар Өрийн удирдлагын тухай хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг хийж байна. Энэ үеэр нийслэл гадаад бонд гаргах асуудалд УИХ-ын зарим гишүүн шүүмжлэлтэй хандсан юм.
УИХ-ын гишүүн Т.Доржханд: Надад анхааруулж хэлэх зүйл байна. Монгол Улсын Сангийн яаманд өрийн удирдлага, санхүүгийн газрын дарга байхдаа 2012 онд би үүнийг сануулж хэлж байсан юм. Тухайн үед Монгол Улс 1.5 тэрбум ам.долларын бондыг гаргаж байсан. Мэргэжилтний хувьд хэлсэн үгийг маань аваагүй учраас өнөөдрийн нөхцөл байдал үүссэн. Энэ чиглэлээр сүүлийн 25 жил ажилласан хүний хувиар үгээ хэлмээр байна. Энэ бол маш их бэлтгэл хангаж байж хийдэг зүйл. Өнөөдөр Монгол Улсын Засгийн газрын бондын үнэлгээ сайн биш байна. 7.2 хувьтай. Монгол Улсад өнөөдөр хөрөнгө оруулалт алга. Хойд хөрш маань дайнтай, урд хөрш Ковидын нөхцөл байдлаас бүрэн ангижраагүй байна. Үр дүнд нь манайд бүс нутагт хөрөнгө оруулалт алга. Ийм нөхцөлд бид Улаанбаатар хот гадаад бонд гаргах эрхийг нээх гэж байгаа нь өөрөө эрсдэл юм. Үе үеийн хотын дарга нар энэ асуудлыг тавьдаг байсан. Гол нь бэлэн биш учраас энэ саналыг авдаггүй байлаа. Ядаж дотоодынхоо бондын зах зээлийг нээчих гэдэг асуудлыг тэдэнд тавьдаг байсан. Дотоодын зах зээлийг нээж, өгөөжийн муруй үүсгэж байж харилцаа явагддаг. Тэгж байж зээлжих зэрэглэл тогтоодог. Гэтэл өнөөдөр шууд гадаад бонд гаргана гэж орж ирж байна. Хэрвээ улаанбаатар хот бонд гаргаад түүнийгээ төлж чадахгүй бол Монгол Улсын Засгийн газрын үнэт цаас болж, эргэж дуудагдах нөхцөл байдал үүсдэг. Энэ бол Засгийн газрын бүх бондод нөлөөтэй. Дефольт зарлавал бүхэлдээ зарлахад хүрдэг. Хоёрт, энэ мөнгийг юунд зарцуулах вэ, ямар өгөөжтэй зарцуулах вэ гэдэг маш чухал. 2012 онд бид баахан юм яриад мөнгөө босгосон ч ямар ч төсөл байгаагүй. Сүүлдээ зураг төсөл байхгүй учраас баахан замын төсөл санхүүжүүлсэн.
Өнөөдөр бид богино хугацаатай бонд босгох боломжтой. Гурван жилийн бонд босгоод байшингаа бариад бид зарж чадах уу. Улаанбаатар хотод өнөөдөр төсөл удирдах чадвар байгаа юу. Энэ бүгдээ харгалзаж үзэж шийдвэрээ гаргах ёстой шүү.
УИХ-ын гишүүн О.Цогтгэрэл: Улаанбаатар хот бонд гаргах нь. Бонд гэдэг чинь өр гэсэн үг. Үүнд Засгийн газар баталгаа гаргаж байна. Засгийн газрын баталгаатай учраас Монгол Улсын болоод Засгийн газрын өрөнд тооцогдоно. Тиймээс маш их хариуцлагатай хандах ёстой. Өмнө нь бид олон удаа гоё нэртэй бонд гаргасан. Энэ өрүүд нь ажил хийхийн төлөөх нь бараг байсангүй. Чингис бонд чинь сайн муу нэртэй ч аймгуудыг автозамаар холбох, эрчим хүчний чадлыг сайжруулах, гудамж төсөл гээд зорилготой байсан. Үүнээс хойш гаргасан бонд бол өрийг өрөөр санхүүжүүлэх, хойшлуулах л түвшингийн харилцаатай байсан. Нийслэлээс авах бондын хэмжээ нь хэр вэ. Яг ямар төсөлд оруулах юм бэ. Орон сууцны төслүүдийг санхүүжүүлнэ гэж энд бичсэн байна. Гэтэл орон сууц барих чинь төрийн ажил мөн үү. Хувийн хэвшлийн хийж чаддаг ажилд ингээд оролцох нь зөв үү. Яг тодорхой ямар төслүүд байгаа юм бэ? Өнгөрсөн онд 500 тэрбумын бонд гаргах асуудал бас яригдаж байсан.
Нийслэлийн Засаг даргын орлогч О.Номинчимэг: УИХ-ын тогтоолын төсөл дээр гадаад үнэт цаас гаргасан тохиолдолд юунд зарцуулах вэ гэдгийг маш тодорхой тусгасан. Улаанбаатар хотын түгжрэлийг бууруулах, гэр хорооллыг орон сууцжуулах хуулийн дагуу Сэлбэ дэд төв дээр түшиглэсэн орон сууцжуулах төсөл арга хэмжээ гэж байгаа. Нийтдээ 160-аад га газрын чөлөөлөөд түүн дээрээ түшиглэн нийт 12 мянган айлын орон сууц барих төсөл хийгдэж байгаа. Тиймээс тодорхой төсөлд зориулсан үнэт цаас гаргах зөвшөөрөл авч байгаа юм.
Бидний хувьд нийгмийн суурь үйлчилгээтэй жишиг болохуйц орон сууц хорооллын төслийг хийж хэрэгжүүлэхээр төлөвлөлт хийж байна. Өмнө нь 500 тэрбум төгрөгийн дотоодын үнэт цаас гаргахаар төлөвлөж байсныг судлаад үзвэл зардал өндөртэй бонд учраас энэ ажил түр зогссон.
