Нийслэлчүүдийг ирэх өвөл сайжруулсан шахмал түлшээр 100 хувь хангах сайжруулсан шахмал түлшний зүүн бүсийн үйлдвэрийн ажлыг эхлүүлэх ёслолын ажиллагаа өнөөдөр боллоо. Үйлдвэрийн бүтээн байгуулалтын ажлыг ийн эхлүүлж ирэх 11 сард ашиглалтад бүрэн ашиглалтад оруулна. Ингэснээр гэр хорооллын 220.000 айл өрх, цаашлаад Налайх, Багахангай, Багануур, Өлзийт хороолол, Шувуун пабрик, 61 гарам зэрэгт байрлах гэр хорооллын айл өрхийг сайжруулсан түлшээр юм.
Үйлдвэрийн ажлыг эхлүүлэх үйл ажиллагааны нээлтэд Монгол Улсын Ерөнхий сайд У.Хүрэлсүх, Эрчим хүчний сайд Ц.Даваасүрэн, Нийслэлийн Засаг дарга бөгөөд Улаанбаатар хотын захирагч С.Амарсайхан, Тавантолгой түлш ХХК-ийн ТУЗ-ийн дарга Ж.Батбаясгалан, Гүйцэтгэх захирал М.Ганбаатар нарын албаны хүмүүс оролцлоо.
Монгол Улсын Ерөнхий сайд У.Хүрэлсүх нээлтэд хэлсэн үгэндээ, “Эрчим хүчний яам, “Тавантолгой түлш” ХХК-ийн хамт олон болон бусад холбогдох хүмүүс маш сайн ажилласан. Иргэд маань ч сайн дэмжсэн. Шахмал түлш хэрэглэснээр бид энэ өвөл утааг 50 хувиар бууруулж чадлаа. Цаашид дахин бууруулна. Хоёр дахь үйлдвэр ирэх арваннэгдүгээр сард ашиглалтад орно. Одоогийн шахмал түлшний үйлдвэрийн түүхий эдийг Өмнөговь аймаг дахь Ухаа худгийн уурхайгаас авто замаар тээвэрлэж байна. Тавантолгой-Зүүнбаянгийн төмөр зам ашиглалтад орсноор түүхий эдийг төмөр замаар тээвэрлэх боломжтой болно.” гэлээ.
Үйлдвэр баригдсанаар 1500 хүний ажлын байр бий болох бөгөөд уг ажлын байранд Налайх хотын иргэд ажиллах боломж бүрдэнэ гэдгийг ч тэрээр онцолсон юм.
Зүүн бүсэд баригдаж буй энэхүү үйлдвэр нь 6 шугамтай, хоногт 30 мянган тонн, жилд 600 мянган тонн шахмал түлш үйлдвэрлэх хүчин чадалтай юм.
Үйлдвэрийн тоног төхөөрөмжийн хувьд байгаль орчинд ээлтэй, тоосжилтгүй далд шугамтай гэдгээрээ онцлогтой гэдгийг Тавантолгой түлш ХХК-ийн Гүйцэтгэх захирал М.Ганбаатар хэлсэн юм.
Энэ үйлдвэрийг түшиглээд 110 квт-ын дэд станц баригдана. Мөн төмөр замыг Баян өртөөг өргөтгөж ачаа тээврийн ачиж буулгах өргөтгөлийн ажил хийгдэнэ гэдгийг ч албаныхан хэлж байна.
Улаанбаатар хотын баруун бүсэд байрлах үйлдвэрийг ч цаашид бага багаар зүүн тал руу шилжүүлэн суурьлуулах замаар шахмал түлшний үйлдвэрлэлийг хотоос гаргах юм байна.
