Сүүлийн үед АН-ын лидерүүд 2020 оны сонгуульд бие даан нэр дэвших мэдэгдлээ ар араасаа цуварч олон нийтэд зарлаж эхэллээ. Энэ нь өнгөн талдаа АН-ын дотоод зөрчил савнаасаа хальсан мэтээр нийгэмд үзэгдэж болох талтай ч нөгөө талаараа лидерүүдийн эрх мэдлийн төлөөх цусгүй дайн олон нийтэд ил тодоор харагдах болсон гэлтэй.
Тэр ч утгаараа АН-ын дарга асан Н.Алтанхуяг, Э.Бат-Үүл, Н.Дэлгэрмаа, С.Баярцогт нарын акулууд намын даргынхаа эсрэг тэмцэхээр зориг шулуудсан.
Намдаа хөөгдсөн нэр зүүсэн АН-ын дарга асан Н.Алтанхуяг Үндэсний Аудитын газарт мөрийн хөтөлбөрөө өнгөрсөн долоо хоногт хүргүүлсэн. Сонгуулийн тухай хуульд бие даагчид дөрөвдүгээр сарын 25-ны дотор мөрийн хөтөлбөрөө аудитын байгууллагад хүргүүлж, хянуулна хэмээн заасан хуулийн хугацаанд хүргүүлсэн нь тэр бололтой. Нийслэлийн захирагч асан Э.Бат-Үүл ч “намын жинхэнэ дарга З.Энхболд мэтийн ардчиллын дайснуудтай тэмцэхээр УИХ-ын сонгуульд бие дааж нэр дэвшүүлэхээр шийдэж хүсэлтээ өглөө” хэмээн твиттер хуудаснаа жиргэж СЕХ-нд хүсэлтээ хүргүүлсэн.
Ийнхүү хөнжилдөө хөлөө жийлцэж 2020 оны сонгуулийг цусгүй тулааны талбар болгохыг хүсэгчдийн санаархал нь эрх мэдэл булаацалдаан төдийгүй хэдэн жилийн туршид нуугдсан хувийн мөчөөрхөл, дайсаналын нэгэн хэлбэр ийнхүү дуусахгүй үргэлж байгаа бололтой. Мэдээж энэ бүхэн нь хотын захирагч асан Э.Бат-Үүлийн “АН бол ардчилал биш юм” хэмээн твиттер хуудаснаа жиргэснээс хэр гүн гүнзгий ан цав үүссэнийг илтгээд өгнө.
АНхнаасаа таван намын нэгдлээс тулгын чулуугаа тавилцсан монголын ардчилагчид буюу АН-ынхан фракц, жалга довны үзлээрээ ийнхүү дахин хуваагдалд хүрч өөр зуураа хэмлэлдэж эхэллээ. Ямартай л нөгөө жоомоо алах гээд гэрээ шатаав гэдэг шиг эрх мэдлийн төлөө улайрч намын лидерүүдээ буланд шахаж, квотгүй үлдээж байгаа С.Эрдэнэ дарга ирэх сонгуульд энд тэндээс цуглуулсан эрээвэр хураавар нэр дэвшигчидтэйгээ төдий л хол давхихгүй л болов уу.
Нөгөө талаараа АН-ын гол тоглогчид болох акулууд намын даргаа баг удирдан сонгуульд оролцож байгаагүй учраас ялагдана гэдгийг эртнээс тооцоолж ийнхүү ганцаарчилсан тоглолт хийж өрх тусгаарласан байх ч магадлалтай.