УОК эрсдэл өндөртэй хилийн боомтуудын үйл ажиллагаатай газар дээр танилцаж эхлээд байна. Монгол Улс дахь хилийн боомтуудаас хамгийн эрсдэлтэй нь Алтанбулаг боомт. Хилийн чанадаас ирж буй монгол иргэдээс гадна ачаа тээврийн урсгал тус боомтоор өдөр бүр нэвтэрч буй.

Тиймээс тус боомт дээр тусгаарлалт, хамгаалалт, халдваргүйтгэл хэрхэн хийгдэж байгааг сонирхуулъя. Уг мэдээллийг Сэлэнгэ аймгийн Эрүүл мэндийн газрын дарга Ж.Од УОК-ын гишүүдэд танилцуулсан юм. Тэрээр энэ танилцуулгын үеэр “Алтанбулаг хилийн боомтоор хүний бөөгнөрлийг үүсгэснээр халдвар тараах нөхцөлийг бүрдүүлж эрсдэлтэй нөхцөл байдалтай байна” гэсэн юм.

Жолооч нар өглөөний 08:00 цагаас оройн 20:00 цагт Монгол Улсын хилээр орж ирж Алтанбулаг боомтын хилийн улаан бүсэд машин дотроо байрладаг.

Аймгийн нэгдсэн эмнэлгийн лаборант 18:00 цагаас 20:00 цагийн хооронд жолооч нар дээр очиж шинжилгээ авдаг.

Энэ үед Мал эмнэлэг, Зоонозын өвчин судлалын 2 багийн 7 мэргэжилтэн хилээр орж ирсэн иргэд тээврийн хэрэгсэл ачаа тээш талбайд халдваргүйтгэл хийдэг.

Дашрамд дурдахад, Сэлэнгэ аймгийн Алтанбулаг хилийн боомтоор Монгол Улсад зөөвөрлөгдөн орж ирж батлагдсан 155  тохиолдол бүртгэгдсэн. Үүний 118 нь эх орондоо ирж байгаа иргэд, 37 нь ачаа тээврийн жолооч. Өнөөдрийн байдлаар 306 иргэнийг ажиглалтын 16 байранд 143 иргэнийг тусгаарлах 54 байранд тусгаарлаж байна. Нийт иргэдийн 186 нь эмэгтэй, 323 нь эрэгтэй. Алтанбулаг хилийн боомоор Монгол Улсаас гадна 15 орны жолооч ачаа тээвэр хийж байна.

Эх сурвалж: shuurhai.mn

Б.ЗАЯА