Баасан гарагт Токио 2020 зуны олимпын наадам албан ёсоор нээгдсэн билээ.
Нээлтийн ёслол коронавирусийн цар тахлын улмаас хязгаарлагдмал хүрээнд үзэгчгүй хоосон стадионд зохион байгуулагдсан. Мөн энэ удаагийн наадмын нээлтэд оролцохоор дэлхийн 11 улсын төр, засгийн тэргүүнүүд Токио хотод хүрэлцэн иржээ. Япон улсын Засгийн газар уг нь үүнээс олон тооны удирдагчдад урилга илгээсэн юм.
Япон улсын гол холбоотон АНУ-аас тэргүүн хатагтай Жилл Байден оролцсон байна. Дэлхийн аж үйлдвэржсэн долоон их гүрний удирдагчдаас ганцхан Францын ерөнхийлөгч Эммануэл Макрон оролцжээ.
Макроны хувьд 2024 оны зуны олимпыг зохион байгуулах орны ерөнхийлөгч гэдэг утгаараа ач холбогдол өгч байгаа юм.
Нээлтийн ёслолд Польш, Армени, Косово, Хорват улсуудын ерөнхийлөгч нар, Монгол, Монтенегро зэрэг улсуудын ерөнхий сайд нар оролцжээ.
Нээлтийн ёслол эхлэхээс өмнө Япон улсын эзэн хаан Нарүхито наадмын нээлтэд оролцохоор Япон улсад айлчлан ирсэн 11 улсын 12 өндөр албан тушаалтныг хүлээн авч, хүндэтгэл үзүүлсэн байна.
Олимпын наадмыг зохион байгуулж буй Токио хотод одоо цар тахлын онцгой байдлын дэглэм дөрөв дэх удаагаа үйлчилж байгаа. Баасан гарагт тус хотод коронавирусийн халдварын 1,359 шинэ тохиолдол бүртгэгджээ. Өмнөх өдөр нь сүүлийн зургаан сарын хамгийн өндөр үзүүлэлт болох 1,979 тохиолдол бүртгэгдсэн байна.
Эх сурвалж: Kyodo News
