Нөмрөгийн дархан цаазат газрын 80 хувь нь шатчихлаа. Модот хамар халзарч, Соёлз уул хуйхлагдчихлаа, Мобикомын дарга нараас болж. Дархан цаазат газар руугаа дураараа бэлчих зөвшөөрөл олгож, “шатаах” эрх бэлэглэсэн дарга нарт хэзээ хариуцлага тооцох вэ, Г.Тэмүүлэн сайд аа.

Дорнод аймгийн Халхгол сумын Цогтсүмбэр баг, Бичигтийн Өндөр гэх газар ой хээрийн түймэр гарсан гэх дуудлага аравдугаар сарын 8-ны 11:55 цагийн орчимд ирсэн байдаг. Нөмрөгийн тусгай хамгаалалттай газарт 587.744 га буюу ойролцоогоор 5.880 ам км газар хамаарна. Дархан цаазат газрын 80 орчим хувь нь бүрэн шатжээ. Нөмрөг бол газрын гайхамшиг, усны тунгалаг, өвсний сайн сорчлон ургадаг, нэн ховор амьтдын диваажин болсон онгон, дагшин газар. Монгол орны хүний хөл хүрээгүй цөөхөн газрын нэг. Гэтэл одоо Нөмрөгийн сав газарт торойх амьтан, торох мод, ургамал бараг л үлдсэнгүй. Шатсан газар сэргэх ч түймэрт өртсөн мод, бут дахин сэргэхгүй, үхнэ нь гэдгийг учир мэдэх хүмүүс учирлаж байна. Халхголын цэргийн ангид дарга нар амрах гэж очдог. Халхгол ч гэлтгүй хилийн цэргийнхний манаж байгаа онгон дагшин байгаль руу Монголын дарга нар жилийн дөрвөн улиралд нүүдэлдэг. Ерөнхий газраас нь утас цохилоо, хэдэн бор хилчид нь амрагчдыг хүлээж авахаас өөр аргагүй. Аль сайхан бүхнээ дэлгэж тавиад, амралтыг ая тухтай байлгах гэж хичээдэг. Ийм л юм боллоо, Халхголд.

ЗУРГИЙН ТАЙЛБАР: НӨМРӨГИЙН ДАРХАН ЦААЗАТ ГАЗРЫН ШАТСАН БАЙДАЛ

Хилийн цэргийн 0198 дугаар ангийн захирагч, хурандаа Б.Гантөгс хилийн Сүмбэр боомтыг өндөр хурдны шилэн кабельд холбох арга хэмжээний нээлтэд оролцсон Хилийн боомтын захиргаа, Мобиком корпорацын удирдлага, орон нутгийн иргэд болох таван автомашин, 13 хүнийг аравдугаар сарын 6-8-нд хилийн бүсэд нэвтрэх зөвшөөрөл олгожээ. Хил хамгаалах ерөнхий газраас хурандаа Б.Гантөгс зөвшөөрөл олгосон гэж байгаа нь инээдтэй байна. Монгол орны хилийн бүс, дархан цаазат газар руу нэвтрэх эрхийг ганц хурандаа олгодоггүй байлгүй дээ. Хил хамгаалах ерөнхий газрын командлагч нь мэдэж, дээрээс нь зөвшөөрөл өгдөг байх ёстой. Хэрэв ганцхан хурандаагийн зөвшөөрлөөр дархан цаазат газар руу нэвтэрдэг бол эмгэнэл юм. Дүрмээ өөрчилж, хуулиа эргэж харах ёстой гэсэн үг л дээ.

Шадар сайд Н.Номтойбаяр “Нөмрөгийн заставт "Мобиком" шилэн кабель тавих шаардлага байхгүй. Дархан цаазат газарт хэн дуртай нь ордог юм биш. УИХ-ын гишүүн байлаа ч зөвшөөрөл авч нэвтэрдэг. Гол нь тийшээ орох ажил хэргийн шаардлага байсан уу. Нөмрөгийн заставт "Мобиком" шилэн кабель тавих шаардлага байхгүй. Эдийн засгийн хувьд ч Мобиком 100 км шилэн кабель татах уу. Мобикомын хоосон "Уучлаарай" гэдэг үг надад сонин биш байна” гэж мэдэгдсэн. Харин “Мобиком”-ынхан хоосон уучлалтынхаа араас “Хариуцлага хүлээнэ, хамтран ажиллана” гэж мэдэгджээ.

Г.Тэмүүлэн сайд аа, зөвшөөрөл олгосон гэж Б.Гантөгс хурандаагаар туг тахихаас илүүтэйгээр ерөнхий командлагчийг нь огцруулъя. Дархан цаазат газар руу хэн дуртай нь бэлчдэг асуудлыг цэгцлэх цаг нь иржээ.