Монгол Улсад сэргээгдэх эрчим хүчний үндэсний төв үүсч, хөгжсөний 30 жилийн ой тохиож буй билээ.

Энэхүү түүхэн ойг тохиолдуулан Монгол Улсын Ерөнхийлөгч Халтмаагийн Баттулга зарлиг гаргаж, Монгол Улсын гал голомт болсон эрчим хүчний салбар, тэр дундаа дэвшилтэт технологи, инновацийг нэвтрүүлж, хөгжлийн түүчээ болж буй сэргээгдэх эрчим хүчний салбарын үе үеийн түүхийг бүтээлцсэн ахмад ажилчид, ажил үйлсийг нь залгамжлан үр бүтээлтэй үргэлжлүүлэн яваа зарим ажилтан, албан хаагчдыг Төрийн дээд одон, медалиар шагналаа.

Ерөнхийлөгчийн зарлигаар Сэргээгдэх эрчим хүчний үндэсний төвийн ахмад ажилтан Моломын Жанчив, Шоонойн Төмөрбат нарыг Алтангадас одонгоор, тус төвийн Техник, аж ахуйн ажилтан Сандагийн Бямбадаваа, Хяналтын инженер Батмөнхийн Халиунаа, Техникч Намхаймядагийн Батзориг нарыг Хөдөлмөрийн хүндэт медалиар шагнасныг Монгол Улсын Их Хурлын гишүүн, Засгийн газрын гишүүн, Эрчим хүчний сайд Ц.Даваасүрэн гардуулж, сэргээгдэх эрчим хүчний салбарын нийт ажилтан, албан хаагчдад баяр хүргэлээ.

“Сэргээгдэх эрчим хүчний үндэсний төв” ТӨААТҮГ нь БНМАУ-ын сайд нарын Зөвлөлийн тогтоолоор 1989 оны 01 дүгээр сарын 01-ний өдөр Эрчим хүчний нөхөн сэргээгдэх эх үүсвэрийг ашиглахад шаардагдах төхөөрөмж зохион бүтээх, туршин үйлдвэрлэх зорилгоор “Сэргээгдэх эрчим хүчний Шинжлэх-Ухаан үйлдвэрлэлийн нэгдэл” аж ахуйн тооцоот үйлдвэрлэлийн нэгдэл нэртэйгээр үүсгэн байгуулагдаж байсан түүхтэй.

Байгуулагдсан цагаас хойш байгаль орчинд ээлтэй эрчим хүчний эх үүсвэрүүдийг судлах, төсөл хөтөлбөр хэрэгжүүлэх, сэргээгдэх эрчим хүчийг олон нийтэд сурталчлан таниулах, дэлгэрүүлэх ажлыг амжилттай хийж гүйцэтгэн “Сэргээгдэх эрчим хүчний үндэсний хөтөлбөр”, “100,000 нарны гэр” үндэсний хөтөлбөр, “Богдын голын УЦС-ыг шинэчлэх” төсөл, ХБНГУ-ын Техникийн хамтын ажиллагааны нийгэмлэг /GIZ/-ийн “Сэргээгдэх эрчим хүчний ашиглалтыг дэмжих” төсөл, Дэлхийн банкны буцалтгүй тусламжаар хэрэгжсэн “Хөдөөгийн цахилгаан хангамжид сэргээгдэх эрчим хүчийг ашиглах” зэрэг олон төслүүдийг хэрэгжүүлсэн байна.

Шуурхай.мн