Оны  ОНЦЛОХ тамирчид: Эрдэнэбатын Цэндбаатар


Архангай аймгийн Чулуут сумын уугуул Үндэсний шигшээ баг, “Ажнай” групп, ШШГЕГ-ийн "Сүлд" спорт хорооны тамирчин, ДАШТ-ий хүрэл медальт, Азийн наадмын аварга, Азийн аварга Эрдэнэбатын Цэндбаатар.

Анхны багш нь Д.Энхтайван. Боксын спортоор 10 настайгаасаа хичээллэж эхэлсэн. 2008 оны Бээжингийн олимпод Монголын боксчид оргил амжилтаа үзүүлэн Э.Бадар-Ууган алт, П.Сэрдамба мөнгөн медаль зүүн эх орон, элэг нэгтнүүдээ баярлуулсан билээ. Тэдний амжилт олон хүүхлийн боксоор хичээллэх хүслийг бадраан Спортын ордныг зорьсоны нэг нь Э.Цэндбаатар юм. Азийн хүүхдийн гуравдугаар их наадмын мөнгө, залуучуудын Азийн АШТ-ий хүрэл, Германы “Химийн цом” тэмцээний Алтан медаль, Бага дэлхийн аваргын мөнгөн медальт. Рио-гийн олимпд хүрэл медалийн төлөө тулалдсан.

Чингэлтэй дүүргийн 57 дугаар сургуулийг 2015 онд төгссөн Э.Цэндбаатар боксын спортын оргил амжилтаа үзүүлэхийн тулд Их сургуульд сурах мөрөөдлөө хойш тавин бүх цаг заваа бэлтгэл сургуулилтандаа зарцуулж байгаа. Индонез улсын нийслэл Жакартад болсон 2018 оны Азийн наадам, энэ оны дөрөвдүгээр сард Тайландын Бангкок хотод болсон Азийн АШТ-д тус тус түрүүлсэн. Энэ жилийн ДАШТ-д хүрэл медаль хүртэн Монголын боксчдын 12 дахь медалийг эх орондоо авчраад байна.

2019 он ОХУ-ын Екатеринбург хот Сонирхогчдын боксын 20 дахь удаагийн Дэлхийн аварга шалгаруулах тэмцээн
Хоёр жилд нэг л удаа зохиогддог ДАШТ энэ жил ОХУ-д зохион байгуулагдсан. Олимпын эрх олгохгүй, мөн олон асуудалтай зохиогдсон энэ удаагийн тэмцээнээс 57 кг-ын жинд Эрэдэнбатын Цэндбаатар хүрэл медаль хүртсэн билээ.
Э.Цэндбаатар эхний тойрогт Киргизийн Сейтек Уулу Мунарбекийг 5-0, удаах тойрогт нь Унгарын Ролан Галошийг 5-0 оноогоор илт илүүрхсэн билээ. Тэгвэл хүрэл медалийн төлөө Ирландын Курт Уолкерийг мөн л 5:0 харьцаагаар бөмбөгдөөд өгсөн юм. Мөнгөн медалийн төлөө Узбекистаны боксчин, Азийн наадмын аварга Миразизбек Мирзахалиловтой тулалдахад шүүлтийн будлиан гарч, манай хүнд 0:5 харьцаагаар ялагдал хүлээлгэсэн. Уг тулааны дараа манай боксын холбооноос тулааны шийдвэрийг эсэргүүцэж, Олон улсын боксын холбоонд (AIBA) дүрмийн дагуу эсэргүүцлийн бичиг өгсөн ч хүлээн аваагүй юм. Угаасаа л будлиантай Узбекүүд финалд мөн л Кубын боксчинг луйвардсан. Сонирхогчдын боксын холбоо авлига, найраа, хээл хахуулийн хэрэгт хэт хутгалдсан тул ОУОХ-ноос шийтгэл хүлээж, Токиогийн олимпийг зохиох эрхээ алдан, өмнөх Риогийн олимпийг шүүсэн бүх шүүгч нар олимп шүүх эрхээ алдаад байгаа билээ.
ДАШТ-д эрх олгоогүй учраас манай ширэн бээлийтэнүүд 2020 оны хоёрдугаар сарын 3-14-нд БНХАУ-ын Үхань хотыг зорино. Мөн бас нэгэн боломж байгаа нь тавдугаар сарын 13-24-нд Францын Парис хотноо болох Олимпийн эрх олгох дэлхийн тэмцээнээс олимпод орох эрхийн төлөө тулалдана. Одоо Цэндээд "Токио 2020" олимпийн наадамд оролцон медаль хүртэж, ард түмнийхээ ачийг хариулах ТОМ зорилго бий.

Шуурхай.мн 


Энэ мэдээ таалагдаж байвал: