Ерөнхий сайд асан Л.Оюун-Эрдэнэ огцорсон ч түүнтэй холбоотой улс төрийн болон хууль хяналтын асуудлууд эцэслэн шийдэгдээгүй хэвээр байна. Түүний хүүгийн их хэмжээний орлого, хөрөнгийн эх үүсвэртэй холбоотой маргаан олон нийтийн анхаарлыг татаад байсан бол одоо уг асуудлыг Авлигатай тэмцэх газар (АТГ) шалгаж буй.

Гэсэн ч шалгалт удаан үргэлжилж, ямар нэгэн тодорхой мэдээлэл ил болоогүй байгаа нь эргэлзээ төрүүлж байна.

Түүнчлэн Л.Оюун-Эрдэнэ огцорсоноосоо хойш Улсын Их Хурлын чуулганы хуралдаанд оролцохоо больсон нь анхаарал татаж буй.

Хариуцлага хүлээх ёстой өндөр албан тушаалтнууд хуулийн байгууллагын шалгалтаас өмнө гадаад руу оргон зугтах нь Монголын улс төрийн амьдралд дахин дахин давтагдаж буй харамсалтай үзэгдэл болсон. Яг ийм жишээ нь Ерөнхий сайд асан Ч.Сайханбилэг. Тэрбээр хуулийн байгууллагад шалгагдаж байх үедээ эх орноосоо гадаадын улсыг зорьж, өнөөг хүртэл буцан ирээгүй билээ.

Энэхүү түүх дахин давтагдах эрсдэлтэй байна. Тиймээс АТГ болон хууль хяналтын байгууллагууд төрийн өндөр албан тушаалаасаа чөлөөлөгдсөн ч нөлөө бүхий энэхүү этгээдийн асуудлыг шуурхай, ил тод байдлаар шийдвэрлэх шаардлагатай.

Олон нийтийн дунд хардлага сэрдлэг нэмэгдэхийн хэрээр иргэдийн шударга ёсны үнэт зүйлд итгэх итгэл суларч, төрд итгэх итгэл бүрмөсөн алдагдах аюултай юм.

Шалгалтыг удаашруулах нь тухайн этгээдэд хэргээс зугтах боломж олгож болзошгүй. Хэрэв нөхцөл байдал энэ хэвээр үргэлжилбэл Л.Оюун-Эрдэнэ гадаад руу оргон зайлна гэх хардлага бодит эрсдэл болж хувирахыг үгүйсгэх аргагүй.

С.Сарнай

Эх сурвалж: Sonin.mn