ЭМЯ-наас ээлжит мэдээллээ хийв. ХӨСҮТ-ийн дарга Д.Нямхүү "Өчигдрийн байдлаар нийт 266 хүний шинжилгээ хийсэн бөгөөд бүгдэд нь коронавирус илрээгүй. Үүнд ХӨСҮТ-д тусгаарлагдсан, ажиглалтын байранд байгаа иргэдийн давтан шинжилгээ, тандалтын шугамаар хийсэн иргэдийн шинжилгээ багтсан. Алтанбулагаар орж ирсэн 12 ачаа тээврийн жолоочийн шинжилгээнд коронавирусийн халдвар илрээгүй. Одоо ОХУ-аас ирэх оюутнуудыг хүлээн авах бэлтгэлээ хийж байна. Голомтот бүсээс ирж байгаа учир онцгой анхаарч ажиллаж байна" гэв.
ХӨСҮТ-ийн Тандалт судалгааны албаны дарга А.Амбасэлмаа "Бид 2020 оны нэгдүгээр сарын 7-ноос хойш өнөөдрийг хүртэл 316 сэжигтэй тохиолдлыг илрүүлж, тусгаарлагдаж, ХӨСҮТ-д оношилсон. 78 хувь нь амьсгалын замын цочмог хүнд халдварын шинж тэмдэг, эмнэл зүйтэй байсан. Монгол Улсад нийт 42 батлагдсан тохиолдол болсон. Дандаа зөөвөрлөгдөж орж ирсэн. Ер нь батлагдаж байгаа тохиолдлыг харахад эх орондоо ирээд 1-13 хоногийн дараа, 1-6 удаа шинжилгээний дараа онош нь батлагдаж байгаа. Батлагдсан тохиолдлын 60 орчим хувь нь ОХУ-аас ирсэн иргэд бий. Хүйсийн хувьд 45 хувь нь эрэгтэй. 55 хувь нь эмэгтэй байна. Насны хувьд 11-65 насны хүмүүс бий. Дундаж нас нь 30 нас байна. 15-н наснаас доош 2, 50-ээс дээш насны 7 хүн байсан байна.
Эмнэлзүйн явцын хувьд 42 хувь нь хөнгөн, 35.7 хувь нь дунд, 17 хувь нь хүндэвтэр, 7 хувь нь маш хүнд гэсэн явцтай эмчлэгдсэн. Сүүлийн 3-4 тохиолдлын хувьд биеийн байдал хүндэвтэр ирсэн. Эдгээр хүмүүс маань ядрангуй, ханиалгасан, хоолонд дургүй, бөөлжих, нус гоожих гэх мэт эмнэлзүйн шинж тэмдэгтэй ирсэн байгаа. Зөөвөрлөгдөж орж ирсэн тохиолдлын 15 нь эдгэсэн.
Эдгэрээд гарсан хүмүүс 14 хоног сувилалд эмчийн хяналтад байна. Ингэхдээ хоёр удаа шинжилгээ хийлгэнэ. Шинжилгээ сөрөг гарсан тохиолдолд гэрээр өрхийн эмчийн хяналтад дахиад 14 хоног байна. Энэ хугацаандаа бас шинжилгээ хийлгэнэ. Яг одоогийн байдлаар 5 хүн шинжилгээнд байна. Хоёр хүн ХӨСҮТ-д, нэг хүн гэрийн ажиглалтад, 7 хүн ажиглалтын хугацаа нь дууссан.
Ер нь дөрөвдүгээр сарын 15,16,17-ны онгоцоор ирж, халдвар нь батлагдаж эмчлэгдсэн хүмүүс байгаа. 16-17-нд ирсэн онош батлагдсан 16 тохиолдлын 15 нь эдгэрсэн. Нэг тохиолдлын биеийн байдал сайжирч байгаа. Удахгүй эдгэрнэ.
ОХУ-аас гурван онгоцоор Цэргийн сургуулийн 346 оюутан өнөөдөр эх орондоо ирнэ. Одоо эхний онгоц Монгол руу хөөрч байгаа болов уу. Эдгээр оюутнаа бид хүлээн авахдаа ХӨСҮТ, Цэргийн төв эмнэлэг, “Бага баян” амралтын газар, “Тоёоко инн” зочид буудалд авахаар бэлдэж байна. ОХУ-д цар тахлын халдвар өндөр байгаа. Энэ удаагийн онгоцоор халдварын хавьтал болсон хүүхдүүд ирж байгаа гэх судалгаа байна. Өвдөөд эдгэрсэн хүүхдүүд ч бий. Бүгдийг нь тусгаарлаж авна. Мөн шинэ коронавирусийн халдвар ямар нэгэн шинж тэмдэггүй явж байгаад халдвар илэрч байгаа учраас өнөө шөнөдөө багтаж, 346 оюутнаасаа шинжилгээ авна. Шинжилгээг очиж авах лаборантуудыг бэлдэж байна. Шуурхай хариу арга хэмжээний дөрвөн баг ажиллана. Маргааш бол халдвартай, халдваргүйгээр нь ялгах ажлыг зохион байгуулна" гэв.
