-Ялангуяа Хэнтий аймагт эрс хүйтэрч, цасан шуурга шуурна-

Зүүн аймгуудын нутгаар 15, 16-ны өдрүүдэд хүчтэй шороон шуурга болох талаар ОБЕГ, ЦУОШГ-аас сэрэмжлүүлж, мэдээлэл хийлээ. Хуралд ЦУОШГ-ын дарга С.Энхтүвшин, Урьдчилан мэдээлэх хэлтсийн дарга Оюунжаргал, ОБЕГ-ын Олон нийттэй харилцах төвийн дарга, дэд хурандаа Б.Дуламсүрэн нар оролцлоо. 

Мэдээллийн эхэнд ЦУОШГ-ын дарга С.Энхтүвшин "Маргаашнаас эхлээд Зүүн аймгууд болох Хэнтий, Сүхбаатар, Дорнод, төвийн зарим нутгаар хүчтэй салхи шуурга шуурна. Зарим сумдын хэмжээнд гамшгийн түвшинд хүрч болзошгүй байна. Цаг агаарын нөхцөл байдал маргаашнаас эхлээд муудаж байгаатай холбогдуулан Хөвсгөл, Сэлэнгэ, Булган, Дархан-Уул, Төв, Дундговь, Өмнөговь, Дорноговь аймагт ажиллаж байгаа цаг агаарт зориудаар нөлөөлөх экспидециудын үйл ажиллагааг зогсоож байна. Байгаль, цаг агаарын аюулт үзэгдэл болох учраас 17-ны өдрийг дуустал зогсоолоо" хэмээлээ. 

Харин ЦУОШГ-ын Урьдчилан мэдээлэх хэлтсийн дарга Оюунжаргал "Маргааш өдөр Хэнтий, Сүхбаатар, Говьсүмбэр, Дорноговийн нутгаар, Төв, Дундговийн зарим хэсгээр салхи секундэд 26-28, зарим үед 324 м/секунд хүрч хүчтэй салхилж, шороон шуурга шуурна. Төв, Хэнтий аймгийн зарим хэсгээр хүчтэй цасан шуурга шуурахаар байна. Энэ бол цаг агаарын гамшигт үзэгдэл. Мөн цаг агаарын аюултай үзэгдэл зарим аймагт ажиглагдахаар байна. Тодруулбал, Өвөрхангай, Өмнөговь, Төв, Дундговь аймгийн зарим нутгаар салхи 16-18, зарим үед 24 м/сек хүрч, хүчтэй шороон шуурга шуурна гэсэн мэдээлэл гараад байна. 

14-15-нд  шилжих төвийн аймгуудын хойд хэсгээр, 15-нд төв, говь, зүүн аймгуудын нутгаар, 16, 17-нд Хэнтий аймагт хүчтэй цасан болон шороон шуурга шуурч, эрс хүйтэрнэ гэдгийг анхааруулж байна. 2008 оны тавдугаар сарын 26-ны өдөр ажиглагдсан цаг агаарын гамшигт үзэгдэлтэй маш төстэй байгаа учраас бид онцгойлон сэрэмжлүүлж байгаа юм. Тухайн үед Хэнтий, Сүхбаатар, Дорноговь аймгийн нутгаар салхи секундэд 26-28, цаашлаад 34 метр хүртэл салхилсан. Хэнтий аймагт цасан шуурга шуурч, гамшигт үзэгдэл ажиглагдсан. Сүхбаатар, Дорноговь аймагт шороон шуурга шуурч байлаа. Тухайн үед Онцгой байдлын газар, цаг уурын байгууллагаас сэрэмжлүүлсэн хэдий ч 52 хүний амь нас эрсдэж, 324 мянган малд хоргодож, 100 гаруй гэр, байшин нурсан. 

Нэг талаас байгалийн давагдашгүй хүчин зүйл хэдий ч хүний хайхрамжгүй байдлаас үүдэлтэй. 2008 оны тавдугаар сарын 26-ны өглөө маш сайхан дулаахан, багавтар үүлтэй байсан. Ялангуяа Хэнтий, Дорнод, Сүхбаатар аймгийн нутгаар. Гэвч гамшигт үзэгдэл болсон. Яг үүнтэй адилхан гамшиг болох гээд байна. 15-ны өдөр өглөөгүүр сайхан дулаан байна. Үдээс хойш темпертур огцом унаж, цасан болон шороон шуурга шуурна шүү. Өглөөний дулаанд хууртаад, нимгэн нойтон гарч явав аа. Гамшигт үзэгдэл 15, 16, 17-ны өдөр Зүүн гурван аймагт салхи, шуурга үргэлжилнэ. Ялангуяа Хэнтий аймагт аюулт үзэгдэл болно шүү" хэмээлээ.