П.АМГАЛАН

“Ирксиб строй” ХХК-иас Богд банк 1.3 тэрбум төгрөгөөр байр давхардуулан зарж үйлчлүүлэгчээ залилж байгаа асуудлаар мэдээлэл хийлээ. Энэ талаар тус компанийн гүйцэтгэх захирал Г.Нарангэрэл “Манай компани барилгын чиглэлээр 10 гаруй жил үйл ажиллагаа явуулж байна. Бизнесийн үйл ажиллагаагаа өргөжүүлэх, барилгын санхүүжилтээ бүрдүүлэх зорилгоор Богд банкнаас 2.8 тэрбум төгрөгийн зээл хүссэн. Эхний удаад банк зээлийн хүсэлтийг хүлээн авахаас татгалзсан. Гэвч 2-3 хоногийн дараа тус банкны захирал Алтанбагана холбогдож, зээлийг 100 хувь мөнгөн хэлбэрээр олгох боломжгүй байгааг хэлсэн. Харин банкны нэр дээр хураагдсан бараа материал, үл хөдлөх хөрөнгө болон автомашиныг зээлийн тал хувьд тооцон авч, үлдсэн мөнгийг бэлнээр олгох санал тавьсан.

Ингээд худалдах, худалдан авах гэрээ байгуулсан. Гэвч зээл олгосон өдөр дансанд мөнгө орж ирмэгц 1.3 тэрбум төгрөгийн зарлага гарсан. Банкнаас бидэнд шилжүүлсэн хөрөнгө нь өмчлөх эрхийн зөрчилтэй, шүүхийн маргаантай байсныг бидэнд мэдэгдээгүй. Шүүхийн маргаантай үл хөдлөх хөрөнгийг нийтийн худалдаанд гаргаж, борлуулах боломжгүй. Гэтэл бодит нөхцөл байдлыг нуун дарагдуулж, бусдын хөрөнгийг давхардуулан худалдсан асуудал үүссэн. Мөн хуулиар банк зээлийг зөвхөн мөнгөн хэлбэрээр олгох ёстой бөгөөд бараа материал, үл хөдлөх хөрөнгийг зээлд дүйцүүлэн худалдах, худалдан авах гэрээ байгуулах хуульд хориглосон юм байна ” гэлээ.

Эх сурвалж:www.zms.mn