ОХУ-аас ирсэн 346 оюутны 119 оюутнаас шинжилгээ авахад 18 оюутнаас КОВИД19 илэрсэн талаар ЭМЯ-наас мэдээлсэн. Ингэснээр батлагдсан тохиолдол 61 болсон юм. 

Харин нэмж 37 оюутнаас коронавирус илэрсэн талаар ЭМЯ-наас мэдээлэл хийлээ. Энэ талаар ХӨСҮТ-ийн дарга Д.Нямхүү "Үдээс хойшхи шинжилгээний хариу гарч, 37 оюутнаас илэрч, нийт батлагдсан тохиолдол 98 боллоо. ХӨСҮТ-д 83 халдвартай иргэн эмчилгээнд орсон байна. 15 нь эдгэрээд гарсныг бүгд мэдэж байгаа. 

Цаашдаа чартер нислэгээр иргэд ирнэ. Үүнд зориулж 250 ор бэлдсэн байгаа. Улмаар дараагийн онгоцуудад ирсэн сэжигтэй тохиолдлуудыг хүлээн авч, хянах, хэрвээ коронавирус илэрвэл эмчилгээнд оруулах бүрэн боломжтой. Өнгөрсөн таван сарын хугацаанд нэлээн бэлтгэл хийсэн. Бололцооныхоо хэрээр иргэдээ татан авах нь бидний үүрэг. Өнөөдөр Истанбулаар ирсэн иргэдээ шинжилгээнд хамруулна. Бид шинжилгээний хариуг ЭМЯ-ны 11.00 цагийн мэдээллээр өгөх болно. 

Хойд хилээр орж ирж байгаа иргэдийг Сэлэнгэ, Дарханд тусгаарлахаар байр бэлдсэн байгаа. 

Эмчилгээнд зориулагдсан эм тариа хангалттай бэлэн байна. Мөн хувийн хамгаалах хэрэгсэл хангалт сайн байгаа. Цаашдаа тоог нь нэмэх талаар бодож байна. 

Дэлхий дээр COVID-19 халдвар авсан хүмүүсийн 80 хувь нь хөнгөн балархай хэлбэрээр өвдөж, эдгэрэх магадлал сайтай байгаа учир бид эрт илрүүлж, эмчилгээ хийх нь юу юунаас чухал юм.

Бусад улс, орнууд өөрсдийн иргэдээ үзэж амжихгүй, гаднын иргэдийг тоохгүй байгаа учраас гадаадад байгаа манай иргэд маш хүнд байдалд байгаа. Тиймээс элэг нэгт монголчуудаа авчирч, эрт илрүүлж хяналтдаа оруулсан" гэсэн юм.