“Амлалт нэхэх ард түмний холбоо” МАН-ыг амлалтаа биелүүл хэмээн шаардаж эхэллээ. Хавар цагийн синдром хэмээн нэрлэгддэг асуудал өндийн босч байх шиг. Тус холбоог өмнөх парламентын үед гишүүнээр ажиллан хууль тогтоож явсан Д.Батцогт удирдаж байгаа аж.
Холбооны удирдагч, тэргүүн Д.Батцогт эрх баригчдаас амлалтыг нь нэхэж, багагүй амжилт гаргаж байгаагаа дуулгасан юм. Мөн ирэх жил Амлалт нэхэх ард түмний холбоо үүсгэн байгуулагдсаны 10 жилийн ой тохиох гэж байгааг хэллээ. Ерөнхийдөө өнгөрсөн хугацаанд манай холбоо эрх баригчдаас амлалт нэхэж, тэмцэж үр дүнд хүрч байсан гэдгийг мэдэж байгаа байх. 2016 оны сонгуулиар 65 суудал авч үнэмлэхгүй ялалт байгуулсан МАН олон сайхан амлалт өгч гарч ирсэн. Гэтэл энэ амлалтаа биелүүлэх биш харин ч эсрэгээр нь бодлого хэрэгжүүлээд явж байгаад нь үнэхээр их харамсаж байна. УИХ-ын сонгуулиас хойш өдийг хүртэл юу хийх бол гэж тэвчээртэй хүлээцтэй хандлаа хэмээн Д.Батцогт ярьсан юм. Өдгөө тус холбооныхны хүлээцтэй байх хугацаа дуусч, тэвчээрийн хязгаарт хүрсэн бололтой. Тиймээс эрх баригчдаас амлалтыг нь нэхэж, хаврын хавсаргатай хамт тэмцэж эхлэх нь.
Үүнийхээ эхлэлийг тавьж УИХ-ын дарга М.Энхболд, Засгийн газрын тэргүүн У.Хүрэлсүх нарт амлалтаа биелүүл гэсэн утга бүхий шаардлага хүргүүлжээ. Ер нь, иргэний нийгмийн байгууллагууд ичээнээсээ гарч эхэлж байх шиг. Энэ хаврын синдром ч дөрвөн есийн хүйтэнтэй зэрэгцэн эхэлж байгаа болохоор урин цагтай золгох үед ширүүсч магадгүй гэсэн яриа ч байна. Синдромд өртөх МАН-ынхан харин баруун зүүн хацартаа хэр жинтэй цохилт авах бол.
