Монгол Улс гадаад орноос иргэдээ татан авах ажиллагааг тасралтгүй зохион байгуулсаар байгаа билээ. Энэ сард гэхэд нийтдээ 8 нислэг үйлдэж, 2000 орчим иргэнээ эх оронд нь авчрахаар төлөвлөсөн. Тэгвэл энэхүү төлөвлөгөөний дагуу өнгөрсөн баасан гараг буюу 6-ны шөнө Австрали руу тусгай үүргийн онгоц ниссэн билээ. Оюутолгой компани ажилчдаа явуулах хэрэгтэй болсон учир МИАТ компанитай хамтарч ажилласан нь тэндээс иргэдээ татаж авчрах алтан боломжийг олгосон юм.
Тэгвэл Австралийн чиглэлийн тусгай үүргийн онгоц өнөөдөр Монголд ирнэ. Австрали улсад байгаа иргэдээс эх орон руугаа буцах хүсэлтэй 1000 гаруй хүний өргөдөл ирсэн. Түүнээс 250 орчмыг нь авчирна. Шууд нислэгийн үеэр онгоц Филиппин улсад бууж, сумлах учир тэнд байгаа 34 иргэнийг мөн авчрах талаар Гадаад харилцааны яамнаас мэдээлсэн билээ. Өнгөрсөн хугацаанд манай улс гадаадаас 9060 иргэнээ татан авсан. Тэгвэл энэ тоо 270 орчмоор нэмэгдэж байна.
