Сүхбаатар дүүргийн Эрүүгийн хэргийн анхан шатны шүүхийн шүүгч Х.Идэр Ерөнхий сайд асан, УИХ-ын гишүүн Ж.Эрдэнэбатад таслан сэргийлэх арга хэмжээ авч, 10 тэрбум төгрөгөөр батлан даалтад гаргасан байна.
Харин Ж.Эрдэнэбат хугацаандаа “төлбөрөө хийгээгүй” учир цагдан хорих шийдвэрийг шүүхээс өчигдөр гаргалаа.
УИХ-ын гишүүн Ж.Эрдэнэбат УИХ-ын сонгуульд нэр дэвшээд Сэлэнгэ аймагтаа ажиллаж байгаа. Шүүхийн шийдвэрийн дагуу холбогдох албаныхан түүнийг баривчлан саатуулахаар Сэлэнгийг зорьсон байна. Тэд баривчлах ажиллагааг гүйцэтгэж Ж.Эрдэнэбатыг ШШГЕГ-ын харьяа Цагдан хорих 461 дүгээр ангид саатуулна гэж эх сурвалж мэдээлэв.
УИХ-ын гишүүн Ж.Эрдэнэбатын өмгөөлөгч Оюунцэцэг гэх эмэгтэй үйлчлүүлэгчийг нь “Монголд байхгүй” өндөр дүнтэй мөнгөөр батлан даалтад өгөх шүүхийн шийдвэр гарсан гэж яриад байгаа. Харин “үйлчлүүлэгч”-ийнхээ холбогдсон хэргийн талаар огт яриагүй юм.
Ж.Эрдэнэбатын холбогдсон хэрэг анх 2019 оны намар олонд ил болж байсан. Учир нь тэр үед хэрэг нь АТГ-аас прокурорт шилжиж, түүнийг яллагдагчаар татжээ. Энэ талаар дэлгэрүүлэн хүргэхэд, УИХ-ын гишүүн, Ерөнхий сайд асан Ж.Эрдэнэбатад холбогдох хэрэг бүртгэлтийн 190200698 дугаартай хэрэгт АТГ-ын Мөрдөн шалгах хэлтсийн мөрдөгч, комиссар Б.Мижидсамдан хэрэг бүртгэлтийн ажиллагаа явуулж 2019 оны есдүгээр сарын 7-нд эрүүгийн хэрэг үүсгэн яллагдагчаар татах санал гаргаж, хэргийг прокурорт хүргүүлжээ. Үүнийг Нийслэлийн прокурорын газрын прокурор Г.Батбаяр 2019 оны есдүгээр сарын 19-нд хүлээн авч хянаад “Ж.Эрдэнэбат нь УИХ-ын гишүүн, Ерөнхий сайдын үүрэг гүйцэтгэгчээр ажиллаж байх хугацаандаа буюу 2017 оны есдүгээр сарын 13-ны өдөр Засгийн газрын 256 дугаартай “Нөхөх олговрын зориулалтаар олгох тусгай зөвшөөрлийн талбайн солбицол батлах тухай” захирамж гаргаж, улсын тусгай хамгаалалтад авсан газруудын хилийн заагт талбай нь давхацсан тусгай зөвшөөрөл эзэмшигч нартай хэлэлцэн тохирсны үндсэн дээр нөхөх олговрын зориулалтаар тусгай зөвшөөрөл олгох болон өмнөх тусгай зөвшөөрлүүдийг цуцлахыг УУХҮ-ийн сайд Ц.Дашдоржид үүрэг болгосон. Тост, тосон бумбын нурууны улсын тусгай хамгаалалттай газарт талбай нь давхацсан “Элбэг орд” ХХК-ийн ашигт малтмалын хайгуулын XV-14145 дугаартай тусгай зөвшөөрөлтэй талбайн оронд нөхөх олговроор дүйцүүлэн, тус компанийн саналыг үндэслэн XV-20923 дугаартай “Улаан сайр-1”, XV-20922 дугаартай “Улаан сайр-2” талбайг АМГТГ, Кадастрын хэлтсийн даргын 2017 оны есдүгээр сарын 21-ний өдрийн 559 дугаартай “Ашигт малтмалын хайгуулын тусгай зөвшөөрөл олгох тухай” шийдвэрээр “Элбэг орд” ХХК-д олгуулсан. “Элбэг орд” ХХК-ийн захирал С.Соргогбаатараас Өмнөговь аймгийн Гурвантэс сумын нутаг дэвсгэр “Улаан сайр-2” нэртэй газарт орших XV-20922 дугаартай 1463.82 га талбайтай ашигт малтмалын хайгуулын тусгай зөвшөөрлийг 2017 оны арванхоёрдугаар сарын 21-ний өдөр өөрийн хамаарал бүхий 31 хувийг эзэмшдэг, төрсөн дүү Жаргалтулгын Эрдэнэтөгсийн 69 хувийн хувьцаа эзэмшдэг компани болох “Хэрх-Илч” ХХК-ийн нэр дээр ашигт малтмалын хайгуулын тусгай зөвшөөрөл шилжүүлэх гэрээ”-г төрсөн дүү Ж.Эрдэнэтөгсөөр байгуулуулан 5.0 сая төгрөгөөр худалдан авсан.
Улмаар АМГТГ, Кадастрын хэлтсийн даргын 2018 оны дөрөвдүгээр сарын 2-ны өдөр 172 дугаартай шийдвэрээр “Элбэг орд” ХХК-ийн тусгай зөвшөөрөл шилжүүлэхийг хүссэн өргөдлийн дагуу “Улаан сайр-2” нэртэй XV-20922 дугаартай ашигт малтмалын тусгай зөвшөөрлийг өөрийн хамаарал бүхий “Хэрх-Илч” ХХК-д шилжүүлэн авсан. Мөн “Хэрх-Илч” ХХК-ийн захирал Ж.Эрдэнэтөгс нь 2018 оны долдугаар сарын 5-ны өдөр “Улаан сайр-2” нэртэй XV-20922 дугаартай 1463.82 га хайгуулын тусгай зөвшөөрлийг өөрийн найз нөхдийн хамааралтай “Алтай групп” ХХК-ийн ерөнхийлөгч Х.Бат-Эрдэнийн 2018 оны тавдугаар сарын 21-ний өдөр шинээр үүсгэн байгуулсан “Бэст лэнд майнинг” ХХК-д 1.0 сая төгрөгөөр худалдаж тусгай зөвшөөрлийг шилжүүлж, бүрэн эрх, албан тушаалын байдлаа урвуулан ашиглаж, өөртөө болон бусдад давуу байдал бий болгосон үйлдэлд нь Эрүүгийн хуулийн тусгай ангийн 22.1 дүгээр зүйлийн 3 дахь хэсэгт зааснаар эрүүгийн хэрэг үүсгэж яллагдагчаар татсугай” гэж тогтоол үйлдсэн байна.
Энэ хэргийн талаар “Алтай групп”-ийн ерөнхийлөгч Х.Бат-Эрдэнэ “Ж.Эрдэнэбат над руу яриад “Манай дүү Ж.Эрдэнэтөгсийг чам руу явуулчихъя, наад нөхөр чинь Өмнөговь аймагт нэг лицензтэй болсон юм байна. Ж.Эрдэнэтөгстэй хэрвээ талбайгаас юм гарвал, нөөцөөсөө шалтгаалаад хувь тохиролцоод явъя” гэж ярилцсан” гэж мэдүүлжээ.
Мөн Ж.Эрдэнэбатын дүү, “Хэрх-Илч” ХХК-ийн захирал Ж.Эрдэнэтөгс “Х.Бат-Эрдэнэ ах хайгуулын ажил эхлэхээс өмнө “Ах нь хайгуул хийгээд юм гараад ирвэл чамд тодорхой хэмжээний ашиг өгнө” гэж хэлсэн. Тухайн үед би Эрдэнэбатад “Лицензээ шилжүүлээд өгчих гэж байна уу, яах уу” гэж асуусан чинь “Х.Бат-Эрдэнэ юм чинь чамайг хулхидчихгүй байлгүй дээ. Шилжүүлээд өгчих” гэж хэлж байсан” гэсэн мэдүүлгийг АТГ-ын мөрдөгчид өгчээ.
Дашрамд хэлэхэд, уг хэрэгт холбогдсон “Алтай групп” буюу “Алтай констракшн”-ийн захирал Х.Бат-Эрдэнэ мэдүүлэг өгснийхөө дараахан хилээр гараад одоог хүртэл эх орондоо ирээгүй байгаа юм.
ЭРЭН СУРВАЛЖЛАХ АЛБА
Эх сурвалж: “Зууны мэдээ” сонин
