ЭМЯ-наас өдөр бүрийн 11:00 цагт өгдөг ээлжит мэдээллээ хийлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 2016 оронд коронавирусийн халдвар тархаж, 8.1 сая хүн өвчилж, 438 мянган хүн нас баржээ. Одоо 8-10 хоногийн хугацаанд өвчлөл 1 саяар нэмэгдэж байна. Энэ бол өвчлөлийн цар хүрээ, хурд ямар байгааг харуулж байгаа юм.
Сүүлийн 24 цагийн хугацаанд дэлхийд 118 мянган хүн өвчилж, 3000 хүн нас барсан. ОХУ-д 24 цагийн дотор 5248 хүн халдвар авч, нийт өвчилсөн хүний тоо 537 мянгад хүрчээ. Мөн 7098 хүн энэ өвчний улмаас нас баржээ. Манай олон аймагтай хил залгадаг Тува, Буриад, Читид өвчлөл байнга нэмэгдэж байна. Манай улсад 24 цагийн хугацаанд 119 дугаарт 168 дуудлага ирлээ. Иргэд худалдааны төвүүдээр үйлчлүүлж буй иргэд, үйлчилж байгаа худалдагч нар амны хаалт зүүхгүй байна гэсэн гомдол маш ихээр ирүүлж байна. Тиймээс иргэд амны хаалтаа сайтар зүүх хэрэгтэй. БНХАУ-ын хувьд захтай холбоотой өвчлөл нэмэгдэж байгаа. Сүүлийн 4-5 хоногт шинэ өвчлөл Бээжин хотод дэгдэж, голомт үүслээ. Үүнтэй холбоотой Бээжинд онцгой байдал тогтоож, бага сургуулиудын хичээлийг зогсоож байна.
ДЭМБ-ын Ерөнхий захирал өчигдөр хэвлэлийн хурал хийхдээ халдварын тархалтыг хязгаарлаж байгаа улс орнууд анхааралтай байхгүй бол дахин өвчин голомтлон гарч магадгүйг анхаарууллаа" хэмээсэн юм.
ХӨСҮТ-ийн захирал Д.Нямхүү "2020 оны зургадугаар сарын 15-ны өдөр ХӨСҮТ-ийн 2, ЗӨСҮТ-ийн болон Дархан-Уул аймгийн лабораторид 413 хүнд шинжилгээ хийхэд коронавирус илрээгүй. Задалж хэлбэл, ажиглах байранд тусгаарлагдсан 16, Алтанбулаг боомтоор орж ирсэн 350 хүнд давтан шинжилгээ хийхэд вирус илрээгүй. ХӨСҮТ-д тусгаарлагдсан 4 хүний шинжилгээг хийсэн. Вирус илрээгүй. Өнөөдөр нэг хүн эдгэрч, ХӨСҮТ-өөс дараагийн шатны сувилалд шилжлээ. Нийт батлагдсан тохиолдол 197, эдгэсэн 109, эмчилгээнд 88 хүн байна. Биеийн байдлыг нь үнэлбэл, 80 нь хөнгөн, 8 нь хүндэвтэр байга" хэмээлээ.
