Сонгуулийн бэлтгэл ажил дуусч байгаа бөгөөд саналын хуудсыг хэвлүүлж дууссан байна. Харин санал тоолох төхөөрөмжүүдийг орон нутгууд руу явуулж эхэлсэн байна.
Зургадугаар сарын 15-ны байдлаар 16 аймгийн 16 тойрогт санал тоолох төхөөрөмж, саналын хуудас бусад дагалдах төхөөрөмжүүд хүргэжээ. Мөн коронавирусийн халдвараас сэргийлэх зорилгоор сонгогчдод олгох амны хаалт, бээлий зэргийг халдвар хамгаалалтын хэрэгслийг хөдөө орон нутагт хүргэх ажил эхэлсэн байна. Энэ удаагийн Их хурлын сонгуульд хамгийн олон нэр дэвшигчтэй тойрог буюу Сүхбаатар дүүрэгт 38 нэр дэвшигч байгаа бол хамгийн цөөхөн нь 10 нэр дэвшигчтэй тойрог байгаа аж.
СЕХ-ны Мэдээлэл, судалгаа, арга зүйн хэлтсийн дарга Б.Оюумаа "Олон мандаттай томсгосон тойрог учраас 29 тойрог байгуулсан. 29 тойрог нь 2-3 мандаттай. Иргэд хэдэн мандаттай тойрогт амьдардаг вэ гэдгээ мэдэхийн тулд та бүхний гар дээр очиж байгаа тараах материалуудтай танилцаарай. Мөн СЕХ-ны сайтад байршуулсан сонгуулийн хуудасны загвар байгаа. Саналын хуудасны загварыг бүх тойргоор гаргасан. Тиймээс сонгогч манай сайт руу орж өөрийнхөө тойргийг хэдэн мандаттай гэдгээ мэдэх боломжтой. Хуульд тухайн тойргийн мандатын тоотой тэнцүү санал өгнө гэж байгаа. Тэгэхээр гурван мандаттай тойргийн сонгогч гурван нэр дэвшигчийн төлөө саналаа өгнө. Хоёр мандаттай тойргийн сонгогч 2 нэр дэвшигчийн төлөө саналаа өгнө гэсэн үг. Хэрвээ гурван мандаттай тойрог дээр хоёр нэр дэвшигчийн төлөө саналаа өгвөл санал тоолох төхөөрөмж буцааж гаргана. Дутуу тэмдэглэгээ гээд тоолохгүй учраас үүнд сонгогч хүлээж зогсож байгаад дутуу тэмдэглэгээ гэвэл саналын хуудсаа буцааж аваад гурав болгоод нэмж тэмдэглэх боломжтой. Хэрвээ гурваас илүү тэмдэглэгээ хийсэн тохиолдолд санал тоолох төхөөрөмж мөн буцааж гаргана. Гэхдээ дэлгэц дээр илүү тэмдэглэгээ гэсэн мэдээлэл гарна. Тиймээс сонгогч хэсгийн хороонд мэдэгдэн дахин нэг удаа саналын хуудас авах боломжтой. Сонгогч саналын хуудсаа санал тоолох төхөөрөмжид уншуулсныхаа дараа хэдэн секунд хүлээх хэрэгтэй. Саналын хуудас амжилттай уншигдлаа гэсэн тохиолдолд та зөв тэмдэглэжээ гэсэн үг" гэлээ.
