УИХ-ын найм дахь удаагийн сонгууль болж УИХ-ын гишүүд өчигдөр тангаргаа өргөлөө. Энэ удаад гишүүн тус бүр тангаргаа өргөж байгаа нь онцлог үйл явдал болсон юм. Гишүүн тус бүрээс ам, өчгийг нь авч байгаа энэ үйлдлийг иргэд, сонгогчид зөв зүйтэй гэж харж байна. Харин тангараг өргөх явцад зарим нэг гишүүд санаатай болон санамсаргүй алдаанууд гаргалаа. Тухайлбал, УИХ-ын гишүүн Ц.Анандбазар “Монгол Улсын Их хурлын гишүүн би ард түмнийхээ элчийн хувьд нийт иргэн, улсын ашиг сонирхлыг эрхэмлэн төрт ёс, түүх соёлынхоо уламжлалыг хүндэтгэж, Монгол Улсын үндсэн хуулийг дээдлэн сахиж, авлига, ашиг сонирхлын зөрчлөөс ангид байж гишүүний үүргээ чин шударгаар биелүүлэхээ илэрхийлж байна” гэсэн юм. Угтаа тэрээр илэрхийлэх бус тангараглах ёстой байлаа. Үүнээс түүнийг тангаргаа өргөөгүйд тооцож болохоор байгаа юм. Барак Обама АНУ-ын Ерөнхийлөгчөөр сонгогдчихоод тангаргаа буруу өргөсөн тул дахин тангаргийг нь өргүүлж байсан удаатай. Үүнтэй адил УИХ-ын гишүүн Ц.Анандбазарыг дахин тангараг өргүүлж болох юм.
УИХ-ын гишүүнээр сонгогдсон эрхэм нийт сонгогчид, монголчуудад төрийн түшээ болсноо зарлаж, шударга үнэнчээр ажиллахаа тангарагладаг үйл явдал бол энэхүү тангараг өргөх ёслол байдаг. Гэтэл энэхүү тангараг өргөх ёслолын үеэр УИХ-ын зарим гишүүд жалга, довны үзэл гаргасан нь ч олны дургүйцлийг төрүүлсэн юм. Тодруулбал, УИХ-ын гишүүн М.Оюунчимэг итгэл хүлээлгэн сонгосон Чингэлтэй дүүргийнхэндээ баярласнаа илэрхийлж, Ж.Мөнхбат гишүүн амь нэгтэй архангайчууд хэмээн дурьдсан. Тэд ийн алдаа хийсэн учир тангаргаас өөр үг хэлэхгүй байхыг тэдэнд хуралдаан даргалагч анхааруулсан юм.
Г.ХУЛАН
DNN.MN
