ГХЯ-наас цаг үеийн асуудлаар мэдээлэл хийлээ. Энэ үеэр тус яамны Консулын газрын захирал Л.Мөнхтүшиг дараах мэдээллийг өгсөн юм.
Тэрээр “ОХУ-аас сүүлд гурван улстай хилээ нээх шийдвэр гарсан. Эдгээр нь Их британи, Умард Ирландын нэгдсэн вант улс, Танзани болон Турк улс юм. Энэ улсын иргэд, мөн тухайн улсуудад байнга оршин суух эрхтэй хүмүүс буюу гурван сараас дээш оршин суусан албан ёсны зөвшөөрөлтэй гадаадын харьяат иргэн ОХУ хилээрээ нэвтрүүлж байгаа юм. Иймд ОХУ-аар дамжин Монгол улсад ирэх боломж хаалттай гэдгийг иргэддээ анхааруулмаар байна.
ГХЯ өнгөрсөн хугацаанд хилээ хэсэгчлэн нээж буй улс орнуудын ямар нөхцлөөр гадаадын иргэдийг нэвтрүүлж байгаа талаарх бүхий л мэдээллийг судалж иргэдэд хүргэж ирсэн. Өнөөдрийн байдлаар урд, хойш хоёр хөрш гадаад улсын иргэдийг хилээрээ нэвтрүүлэхгүй байх шийдвэр хүчин төгөлдөр хэвээр байгаа” гэв.
