ЖДҮ-ийг дэмжих санг эрх мэдэл, албан тушаалын нөлөөллөөрөө цөлмөсөн нөхөд түрүүчээсээ толгой дараалан "ачигдаж"  байна.

 "Эрүүгийн хуульд хулгайлахыг гэмт хэрэг хэмээж, хүлээлгэх хариуцлагыг ч тодорхой заасан байгаа. ЖДҮ үүнтэй яг ижил гэмт хэрэг"  гэдгийг УИХ-ын гишүүн Б.Энхбаяр Хууль зүй, дотоод хэргийн дэд сайд байхдаа хэдэнтээ хэлээд эцэстээ хөөгдөж, огцорсон. Үнэнийг хатуу хэлж, өөрсөдтэй нь тэрсэлдсэний улмаас залуу хуульч Б.Энхбаяр тийнхүү албан тушаалын цаазад өртөж байв. Харамсалтай нь тэр одоо УИХ-ын гишүүн болоод мөнөөх "хулгайч"-дын заримтай мөр зэрэгцэн сууж байна. Өмнөх парламентын 49 гишүүн тангаргаа умартан, төрийн албаны ёс зүйг уландаа гишгэн, Жижиг дунд үйлдвэрлэлийг хөгжүүлэх сангаас жилийн гурван хувийн хүүтэй зээлийг нэн хөнгөлөлттэй нөхцөлөөр өөрсөддөө олгуулж, иргэдийн боломжийг хулгайлсан нь эхнээсээ тогтоогдож ял авч байгаагийн үргэлжлэлд Я.Содбаатар заавал байх ёстой биш билүү. "Би бол ЖДҮ-чин" хэмээгээд сайдын суудлаас бууж байсан тэрбээр өдгөө Шадар сайдын суудалд заларчихаад ичих нүүр, улайх ёс зүйгүй улам бүр эрээ цээргүй шигдсээр байгаа нь дэндүү ичгэвтэр. 

Төрийн эрх мэдлийг хэтрүүлэн, Тусгай сангийн хөрөнгийг зохион байгуулалттайгаар бүлэглэн ашигласан, завшсан нөхдийн гэмт үйлдэл үнэндээ Б.Энхбаяр гишүүний зүйрлэн хэлсэнчлэн "ХУЛГАЙ" юм. Тусгай сангийн хэтэвчинд гар дүрж, бусдын хоолыг булаасан даанч увайгүй явдал.

Шударга бустай яагаад ч эвлэрэхгүй, зөвхөн үнэний талд байж, ард иргэдийнхээ итгэлийг алдалгүй, алдахаа хүрвэл өөрийн биеийг алдсу хэмээн тунхаглаж байсан Ерөнхий сайд У.Хүрэлсүх ч ердөө жил гаруйхны өмнө найз Я.Содбаатараа ЖДҮ-тэй холбогдсон хэмээгээд Засгийн газрын гишүүнээс нь чөлөөлж байв. Харамсалтай нь тэрбээр монголын ард түмнийг зүгээр л цагаан цаас, дээр нь юу ч гэж бичиж молигодож болно гэж басхүү боддог бололтой.

Монгол Улсын Ерөнхийлөгчтэй зөвшилцөөд, тухайн үеийн УИХ-ын даргад хандан Я.Содбаатарыг Засгийн газрын гишүүнээс чөлөөлүүлж байсан бичиг цаасны нь бэх хатаагүй байхад эргүүлээд энэ засагтаа Шадар сайдаар чирээд ирсэн нь хэтийдсэн дээрэлхэлт юм. Уртын урт нөхөрлөл нь түүнийг ийм алхамд хүргээд байдаг бол эрхэм Я.Содбаатар гуай өөрөө өндөр ёс зүйтэй байж, өдий хүртэл чирч яваа нөхдийнхөө нэр нүүрийг бодоосой. Нэг удаа чөлөөлж, танхимаас хөөчихсөн Хүкт хоёр дахь удаагаа чичлэн хөөх хэцүү байгаа гэдгийг бодолцон эрхэм Шадар сайд гуай өөрийн хүсэлтээр огцорч, ял зэмээ үүрэх тэнхээгүй хэрэг үү... Ийм эрээгүй, эрх мэдэл илүү дутууд шунасан нөхөр энэ улсын САЙД байх эрхгүй юм.

Эх сурвалж: Нийгмийн толь