Нийслэлийн эрүүл мэндийн газрын дарга Л.Төмөрбаатар нь өнгөрсөн долдугаар сарын 10-нд буюу улсын их баяр наадмын үеэр Баянгол дүүргийн Эрүүл мэндийн төвийн дарга Ө.Батжаргалыг ажлаас нь чөлөөлсөн талаар мэдээлж байсан билээ. Тухайн үед БГД-ын Эрүүл мэндийн төвийн дарга Ө.Батжаргал шат шатны холбогдох байгууллагад хандсанаар түүнийг ажилд нь эгүүлэн томилох, НЭМГ-ын дарга Л.Төмөрбаатарын гаргасан Б/34 тоот тушаалыг хүчингүй болгох шийдвэр гарсан байдаг.

            Гэтэл өнөөдрийг хүртэл Л.Төмөрбаатар нь энэхүү шийдвэрийг биелүүлээгүй учраас Нийслэлийн шүүхийн шийдвэр гүйцэтгэх газраас 2020 оны 07 дугаар сарын 23-нд Нийслэлийн Засаг даргын албан үүргийг гүйцэтгэгч Ж.Батбаясгаланд /Хариуцлага хүлээлгэх/ албан тоот хүргүүлсэн байгаа юм. Энэхүү албан тоотод дурьдсанаар Ө.Батжаргалыг БГД-ийн Эрүүл мэндийн төвийн даргын албан тушаалд эгүүлэн томилох, ажилгүй байсан хугацааны үндсэн цалин, нэмэгдэлтэй тэнцэх хэмжээний нөхөн төлбөрийг олгохийг хариуцагчид даалгаж шийдвэрлэсний дагуу НЭМГ-ын дарга Л.Төмөрбаатарт шүүхийн шийдвэр биелүүлэх тухай мэдэгдлийг удаа дараа хүргүүлсэн боловч биелүүлээгүй аж. Иймд зөрчлийн хэрэг үүсгэн Л.Төмөрбаатарт хуульд заасан хариуцлага хүлээлгэж нэн дариу хариу өгөхийг шаардсан. Тиймээс хууль, шүүхийн шийдвэрээ биелүүлдэггүй энэ мэт нөхдөд хариуцлага тооцож, нэр цэвэр залуу, боловсон хүчнээр төрийн албыг удирдуулах нь зүйтэй болов уу. Үүнийг ч мөн адил Нийслэлийн засаг даргын албан үүргийн гүйцэтгэгч Ж.Батбаясгалан та анхааралдаа авахыг хүсье. Түүнчлэн тун удахгүй 2020 оны орон нутгийн сонгууль болно. Үүнтэй холбоотой хар цагаан пиар хөврөнө. Сөрөг хүчин болон нам эвслүүд энэ мэт хууль дүрмээ биелүүлдэггүй хурган дарга нарын фактаар улс төр хийх нь тодорхой. Тиймээс Ж.Батбаясгалан та том толгойтой хурган дарга НЭМГ-ын дарга Л.Төмөрбаатарт хариуцлага тооцох цаг нь болжээ.