ЭМЯ-наас өдөр бүрийн 11:00 цагийн ээлжит мэдээллээ хүргэлээ. Мэдээллийн эхэнд ЭМЯ-ны Тандалт, шуурхай удирдлагын хэлтсийн дарга Д.Нарангэрэл "Дэлхийн 216 оронд коронавирусийн халдвар тархаж,  23 сая 347 мянган хүн өвчилж, 819 мянган хүн нас барж, 16 сая гаруй хүн эдгэрээд байна.  Сүүлийн 24 цагийн дотор дэлхий нийтэд 253 мянган хүн шинээр халдвар авч, 5000 гаруй хүн энджээ. 

24 цагийн хугацаанд манай хөрш ОХУ-д 4445 хүн халдвар авч, 65 хүн нас баржээ. Япон улсад өвчлөл нэмэгдэж байгаа. 493 хүн шинээр коронавирусийн халдвар авч, 13 хүн эндсэн байна. Өвчлөл буурах хандлагатай ч эндэгдэл тогтвортой хэвээр байгаа ажээ.  БНСУ-д 280 хүн шинээр халдвар авсан байна, 24 цагийн хугацаанд. Солонгост өвчлөл нэмэгдэж байгаатай холбогдуулан иргэдийг амны хаалт заавал зүүхийг шаардаж эхэлсэн байна.  

Энэ жил улирлын томуугийн вакциныг хүн болгон зайлшгүй хийлгэх шаардлагатай гэж ДЭМБ-аас зөвлөж байгаа.  Томуу, коронавирусийн халдвар зэрэгцэж илэрвэл юу болохыг одоогоор хэн ч хэлж чадахгүй байна. Тиймээс томуугийн вакцин хийлгэхийг зөвлөж байгаа юм.  Өвчлөл буурч байсан орнуудад дахин дэгдэлт эхэллээ. Сингапурт дахин коронавирусийн дэгдэлт гарч, 51 хүн халдвар авсан байна.   Манай улсын хувьд тусгаарлах байранд шинээр 20 хүн орж, 8 хүн тусгаарлалтаас гарлаа. Одоогоор тусгаарлах, ажиглах байранд 3475  хүн байна.  

24 цагийн хугацаанд 119 тоот дугаарт 108 дуудлага ирж, коронавирусийн эмчилгээний талаар зөвлөгөө авсан" хэмээв.  

ХӨСҮТ-ийн Тандалт судалгааны албаны дарга А.Амбасэлмаа  "2020 оны наймдугаар сарын 24-ний өдөр ХӨСҮТ-ийн болон Дархан-Уул аймгийн вирус судлалын салбар лабораторид нийт 1011 хүнд шинжилгээ хийсэн. Бүх шинжилгээнд коронавирус илрээгүй байна.  Өнөөдөр нийт батлагдсан тохиолдол 298, эдгэрсэн 289 хүн байгаа. Халдвартад 9 хүн эмчлүүлж байгаа. 8 хүний биеийн байдал хөнгөн, нэгийнх нь биеийн байдал хүндэвтэр байна" хэмээлээ.