Монгол Улсын Гадаад харилцааны сайд Н.Энхтайваны урилгаар БНХАУ-ын Төрийн зөвлөлийн гишүүн бөгөөд Гадаад хэргийн сайд Ван И 2020 оны 9 дүгээр сарын 15-16-ны өдрүүдэд Монгол Улсад албан ёсны айлчлал хийхээр болсон талаар ГХЯ-наас мэдээлэв.
Айлчлалын үеэр Гадаад харилцааны сайд нар албан ёсны хэлэлцээ хийнэ. Айлчлалаар хоёр улсын хооронд дээд, өндөр түвшний харилцан айлчлалын давтамжийг хадгалах, хоёр талын бүх салбарын хамтын ажиллагааг урагшлуулах, мөн КОВИД-19 цар тахлаас урьдчилан сэргийлэх хамтын ажиллагааг үргэлжлүүлэх, худалдаа эдийн засгийн хамтын ажиллагааг сэргээхэд гарч буй ахицыг бататгах зорилготой аж.
Одоогийн байдлаар БНХАУ-ын Төрийн зөвлөлийн гишүүн бөгөөд Гадаад хэргийн сайд Ван И Монгол Улсын төрийн өндөрлөгүүдэд бараалхах эсэх нь тодорхойгүй байна. Хэрвээ тэдэнд бараалхвал Монгол Улсад мөрдөгдөж буй хууль журмын дагуу айлчлалын дараа төрийн өндөрлөгүүд 14 хоног тусгаарлагдах юм. Учир нь ЭМЯ-наас "Айлчлалын үеэр халдвар хамгааллын дэглэмийг өндөржүүлсэн бэлэн байдалд зохион байгуулна. Мөн гаднаас ирж байгаа зочдоос шинжилгээ авна. Шинжилгээний хариу 6-8 цагийн дотор гарна. Түүнчлэн ачаа тээшийг нь ариутгана. Айлчлалд дууссаны дараа айлчлалд оролцсон бүх хүнийг 14 хоног тусгаарлах болно” гэсэн юм.
Мөн энэхүү айлчлал нь өндөржүүлсэн бэлэн байдлын нөхцөлд зохион байгуулагдах учир халдвар, хамгааллын горимыг хатуу сахиж, арга хэмжээнд аль болох цөөн хүн оролцуулах зохицуулалтыг ГХЯ-наас хийж байгаа аж.
Айлчлал хоёр хоногийн турш үргэлжлэх бөгөөд БНХАУ-ын Гадаад хэргийн сайд Ван И нь манай улсад айлчлахаасаа өмнө ОХУ, Казакстан, Киргизэд айлчлах аж.
Монгол Улсын Ерөнхийлөгч Х.Баттулга БНХАУ-д цар тахлын эсрэг тэмцэх буй хүнд үед айлчилж, найрсаг харилцаа итгэлцлийг бэхжүүлж байсан бол өнөөдөр манай улсад хөл хорионы дэглэм үйлчилж буй онцгой нөхцөлд Ван И айлчилж байгаа нь энэ удаагийн онцлог хэмээн ГХЯ-ынхан үзэж байна.
Б.Аз
