Монголын агаарын тээвэр, иргэний нисэх тойрсон таагүй асуудал олшрох болов. Энэ сөрөг зүйл нь нисгэгчид, нийт ажилтнуудын хувьд бус түүнийг удирдаж байгаа хэсэг бүлэг нөхдөд байна. Тодотгож хэлбэл ИНЕГ-ын дарга Л.Бямбасүрэн, Шинэ нисэх буудлын  төслийн захирал Т.Энхбат нар болон бусад удирдах албан тушаалтнууд юм. Энэ тухай хэвлэл мэдээллүүд хангалттай дурдсан ч бид булхай луйврыг шийдвэр гаргах түвшинд хүргэх үүднээс дахин онцолж байна. Ийм хэмжээний хөрөнгө завшсан этгээдүүд өндөр албан тушаал хаших бус яллуулсан байх ёстой гэдгийг Гүйцэтгэх засаглалын тэргүүнээс эхлээд холбогдох бүх хүмүүст дуулгая. Ингээд дордохын долоон баримтыг хүргэж байна.

Баримт:1

Аудитын дүгнэлтээс харахад Хөшигийн хөндийн олон улсын нисэх буудал барих төслийн удирдлагууд “Land criuser 200” маркийн нэг автомашиныг зах зээлийн үнээс хэт өндөр буюу 723 сая төгрөгөөр үнэлэн  худалдаж авчээ. Уг нь 723 сая төгрөгийн үнэ хүрсэн “Land criuser 200”-г урьд өмнө Иргэний нисэхийн ерөнхий газрын хоёр ч дарга сэлгэн унаж байсан.  Анх нэг тэрбум  төгрөгийн үнэлсэн гэгдэх ямар ч тоноглолгүй автомашиныг 2017 онд тус агентлагийн тэргүүн дэд дарга Б.Алтанцом, 2018-2019 онд нисэх буудлуудын удирдах газрын дарга Д.Эрдэнэбаатар нар ашиглаж байжээ.

Баримт:2

Тус газрын харьяа агентлагийн нөлөө бүхий албан тушаалтнууд “Mersedes benz sprinter” маркийн эмнэлгийн машиныг 1,377,612,000 төгрөгөөр үнэлэн худалдаж авчээ. Гэтэл 2016 онд үйлдвэрээс гарсан, эмнэлгийн зориулалтаар тохижуулсан ийм төрлийн автомашины зах зээлийн дундаж үнэ 60,000 ам.доллар ажээ. Үүнийг Монгол төгрөгөнд хөрвүүлбэл 180 сая орчим төгрөг. Харин Хөшигийн хөндийн нисэх буудлын төслийн удирдлагууд “Mersedes benz sprinter” маркийн нэг автомашиныг эмнэлгийн тусгай тоноглолтой гэх нэрийдлээр зах зээлийн ханшийг нь 6-7 дахин нугалсан шахаа хийсэн тухай хэвлэлээр дурдсан.

Баримт:3

Шувуу үргээх зориулалттай “Land criuser 70 pick up” автомашин худалдан авахад 318,494,940 төгрөг зарцуулжээ.

Баримт:4

ИНЕГ-ын дарга Л.Бямбасүрэн магистрын сургалтын төлбөрөө өөрийн орлогч Б.Алтанцомоор тушаал гаргуулан улсын төсвөөс төлүүлсэн.

Баримт:5

ИНЕГ-ын дарга Л.Бямбасүрэн Иргэний нисэхийн ерөнхий газрын зардлаар гадаадад сургаж, ивээн тэтгэсэн

Баримт:6

Л.Бямбасүрэн нь  төрсөн ах Мэргэжлийн хяналтын ерөнхий газрын экспорт, импорт хил хорио цээрийн хяналтын газрын Л.Дашмягмаржавын охин Таяаг ямар ч сонгон шалгаруулалтгүйгээр  БНСУ-д улсын зардлаар сургуульд суралцуулах болж, үүндээ 56,750 ам.доллар гаргуулжээ.

Баримт:7

Л.Бямбасүрэнг Иргэний нисэхийн ерөнхий газрын даргаар очсон цагаас хойш тус газрын хөрөнгө жижиг банкуудаар эргэлдэж эхэлсэн гэх мэдээлэл бий. Түүнийг дарга болсон цагаас хойш төрийн мөнгийг зөвхөн төрийн мэдлийн банкаар дамжуулах ёстой гэдэг Засгийн газрын тогтоол хэрэгжихгүй болжээ

Тайлбар:

Тэд энэхүү үйлдлээрээ Нягтлан бодох бүртгэлийн тухай хууль, УИХ-аар соёрхон баталсан Зээлийн гэрээ, Засгийн газрын гадаад зээлийн хөрөнгийг ашиглах, эдгээр хөрөнгөөс санхүүжих, төсөл, арга хэмжээг хэрэгжүүлэх, зохион байгуулах, санхүүжүүлэх, хяналт тавих, үнэлэх журмын холбогдох заалтуудыг зөрчсөн гэдгийг аудитаас тогтоосон. Аудитын ерөнхий газрын дүгнэлтийг ч тус агентлагийн дарга Л.Бямбасүрэн хүлээн авчээ.  Тиймээс Улаанбаатар хотын олон улсын нисэх онгоцны шинэ буудал барих төслийн худалдан авалттай эзэмшигчийн хувьд Иргэний нисэхийн ерөнхий газрын удирдлагууд шууд холбогддог. Тэгэхээр тус төслийн захирал Т.Энхбат, Иргэний нисэхийн ерөнхий газрын дарга Л.Бямбасүрэн нар дээрх хөрөнгийн үр ашиггүй зарцуулалтад тайлбар хийх ёстой гэдгийг албаны хүмүүс дурдсан байдаг. Үүгээр ч зогсохгүй тусгай тоноглолтой гэх автомашинууд дээр гарсан зөрчлийг арилгах, хариуцлага тооцох Үндэсний аудитын газрын албан шаардлага Иргэний нисэхийн ерөнхий газарт 2020 оны гуравдугаар сарын 25-нд ирсэн ч “Үр дүнгийн урамшуулалт цалинг хасаж, албан тушаал бууруулах хүртэл арга хэмжээг авсан” гэх боловч нэр холбогдсон дарга нар нь өнөөдөр төсвийн хөрөнгө зарцуулах эрхтэй хэвээр байна. Ийнхүү Хөшигийн хөндийн нисэх буудлын төслийн удирдлагууд  энэ мэтээр нийт 56 тэрбум төгрөгийн автомашин, тоног төхөөрөмж худалдан авч Иргэний нисэхийн ерөнхий газарт хүлээлгэн өгсөн байдаг.

Түмэн.мн