АТГ-аас Монголбанкны албан тушаалтнууд ББСБ-ын үйл ажиллагаа явуулахыг хориглох чиглэл өгсөн нь нийтийн эрх ашгийг хамгаалахад бодьтой нөлөөлөл болсон билээ. Мэдээж чөлөөт зах зээлийн нийгэмд хэн ямар төрлийн бизнес эрхлэх нь хувь хүмүүсийн асуудал. Гэвч зээл авахад хамгийн их бэрхшээлтэй тулгардаг нийгмийн эмзэг хэсгийн халаасыг 30 хувиар нугалан хүүлдэг хүмүүс төрд өндөр албан тушаал эрхлэх нь ёс зүйд нийцэх үү. Төрийн өндөр албан тушаалтнууд мэдээлэлд ойр, давуу эрхт байдлаас банк бусын бизнес эрхлэнгээ нийтийн эрх ашгийг хамгаалж чадах уу зэрэг асуултууд тавигддаг. Бид энэ удаа ББСБ-ын асуудлаарх нийтлэлийнхээ дараачийн цувралаар гэр бүлээрээ төрд өндөр албан тушаал хашингаа банк бусаар мөнгө хүүлдэг асуудлыг хөндөж байна. Энэ бол ИНЕГ-ын дарга Л.Бямбасүрэнгийн төрсөн, ах дүүсийн бизнес юм.
- ИНЕГ-ын дарга Л.Бямбасүрэнгийн ах дүүс бүгдээрээ төрд өндөр дээд албан тушаал хашдаг.
- Төрсөн дүү Л.Жамбасүрэн Төрийн банкны дэд захирлаар ажиллаж байсан.
- Төрсөн ах Л.Дашмягмаржав /МХЕГ-ын Хорио цээр, стандартын хяналтын хэлтсийн даргаар одоо ажиллаж байгаа.
- Төрсөн ах Л.Төмөрбаатар /НЭМГ-ын даргаар одоо ажиллаж байгаа.
- Л.Оюунцэцэг /төрсөн эгч, дүү аль нь болох тодорхойгүй/
Харин эдгээр таван ах дүү хамтран хувьцаа эзэмшдэг нэг банк бус санхүүгийн байгууллагатай. Тодруулбал, тэд Трасткапитал ББСБ-тай.
Ингэхдээ Л.Бямбасүрэн, Л.Жамбасүрэн, Л.Дашмягмаржав, Л.Төмөрбаатар нарын ах дүүс 2877546 регистрийн дугаартай Трастмед ХХК-иа 2007 онд үүсгэн байгуулж, Улсын бүртгэлд бүртгүүлж байжээ. Эл компани нь ресторан нийтийн хоол, барилгын засал чимэглэл, сургуулийн өмнөх боловсрол, гадаад худалдаа гэсэн чиглэлүүдээр үйл ажиллагаа явуулдаг ашгийн төлөө байгууллага хэмээн бүртгүүлжээ. Компанийн гүйцэтгэх захирлаар нь Төрийн банкны дэд захирлын албыг хашиж байгаад одоо Бүтээгдэхүүн хариуцсан захирлаар ажиллаж байгаа Л.Жамбасүрэнгийн нэр бүртгэлтэй байдаг аж.
Цааш нь ухаж үзвэл ах дүүс Трастмед компаниасаа салаалуулан Трасткапитал ББСБ-ыг 2019 оны дөрөвдүгээр сарын 08-нд байгуулж бүртгүүлсэн болохыг opendatalab.mn нээлттэй мэдээллийн сайтаас харж болно.
Энэхүү ББСБ-ын хамтран эзэмшигчээр хамгийн эхлээд Трастмед компани дараа нь Лувсансамбуугийн Оюунцэцэг, Лувсансамбуугийн Жамбасүрэн, Лувсансамбуугийн Дашмягмаржав, Лувсансамбуугийн Төмөрбаатар нарын нэр бүртгэлтэй байна. Гүйцэтгэх захирлаар нь Л.Оюунцэцэгийн нэр бүртгэлтэй байгаа бөгөөд тэрбээр төрд ямар нэгэн албан тушаал хашдаггүй харин эл бизнесийн байгууллагынхаа гүйцэтгэх захирал статустай нэгэн аж.
Харин нэг анхаарал татаж байгаа зүйл нь ББСБ-ын хамтран эзэмшигчийн жагсаалтад ИНЕГ-ын дарга Л.Бямбасүрэнгийн нэр байхгүй. Гэвч түүний хувь эзэмшдэг Трастмед компани нь Трасткапитал ББСБ-ын хамтран эзэмшигчээр бүртгэлтэй.
ИНЕГ-ын дарга Л.Бямбасүрэн нь 2015 оноос хойш 2019 он хүртэл “Траст Мед” ХХК-д хувьцаа эзэмшдэг болохоо ХОМ-тээ мэдүүлсээр ирснийг АТГ-ын сайтаас тодорхой харж болно.
Ийнхүү төрд ажилладаг өндөр дээд албан тушаалтнууд ББСБ-тай байж түүгээрээ жирийн ард иргэдээс 30 хувийн хүүтэй мөнгө хүүлдэг байдлын нэг жишээ энэ юм.
