“Эрүүл хүнс-Эрүүл Монгол хүн” үндэсний хөтөлбөрийн хүрээнд 15 дах жилдээ зохион байгуулагдсан “Намрын ногоон өдрүүд-2020” үзэсгэлэн худалдаа өнөөдөр өндөрлөж, шилдгүүдээ шалгарууллаа.
“Намрын ногоон өдрүүд-2020” үзэсгэлэн худалдаанд газар тариалангийн салбараас оролцогчдоос “Зохион байгуулалт сайтай оролцсон аймаг”, “Шилдэг сум”, “Зохион байгуулалт сайн оролцсон байгууллага”, “Шинэ сортын ногоо нутагшуулж тарьсан ногоочин”, “Шинэ сортын ногоо нутагшуулж тарьсан ногоочин- хүлэмж”, “Хамгийн олон нэр төрлийн ногоо тарьж сурталчилсан ногоочин”, “Хамгийн их төмс борлуулсан ногоочин”, “Шинэ төрлийн жимс, жимсгэнэ тарьж ургуулсан жимсчин”, “Эмийн ургамал”, “Зөгийн бал”, “Жимс, жимсгэнийн суулгац”, “Байгалийн жимс”, “Шилдэг хоршоо”, “Шилдэг аж ахуй нэгж” номинацад нэр дэвшүүлэн ажлын хэсэг үзүүлэлтийн дагуу шилдгүүдийг шалгаруулан цом, өргөмжлөлөөр шагнав.
Шагналыг ХХААХҮ-ийн Дэд сайд Г.Батсуурь, Газар тариалангийн бодлогын хэрэгжилтийг зохицуулах газрын дарга В.Үнэнбат, Хүнсний үйлдвэрийн бодлогын хэрэгжилтийг зохицуулах газрын дарга Л.Чой-Иш нар гардуулан өгсөн юм.
Зохион байгуулалт сайтай оролцсон аймгаар Өмнөговь аймаг шалгарч, Хүлэмжийн цогцолбор аж ахуйн талбайг 2017 онд БНСУ, ХААИС-тай хамтран байгуулж, 2020 онд говийн бүсийн үр үржүүлгийн төв болон өргөжиж "Алтан намар-2020" үзэсгэлэн худалдаанд 4 сумын 15 ногоочдыг оролцуулжээ. Тус аймгийн ногоочид энэхүү үзэсгэлэнд 50 тн төмс, хүнсний ногоо, жимс жимсгэнэ, 4800 ширхэг даршилж нөөшилсөн бүтээгдэхүүнээр оролцож, нийт 120.0 гаруй сая төгрөгийн борлуулалт хийсэн байна.
Зохион байгуулалт сайтай оролцсон сумаар Сэлэнгэ аймгийн Зүүнбүрэн сум шалгарлаа. Тус сумын ногоочид газар тариалангийн үйлдвэрлэлийн хэмжээ, сонгино, сармисны нэр төрлийг нэмэгдүүлэн энэхүү үзэсгэлэнд 14 ногоочин оролцуулж 0,8 тн сармис,1,5тн сонгино борлуулж нийт 42,5 сая төгрөгийн борлуулалт хийсэн амжилтаар тэргүүлжээ.
Зохион байгуулалт сайтай оролцсон байгууллагаар “Агроэкологийн сургуулийн “таримал судлал, ой, ландшафтын тэнхим” шалгарч, экспресс лаборатори ажиллуулан 300 гаруй ургамлын гаралтай дээж бүтээгдэхүүнд шинжилгээ хийж, 100 гаруй ногоочдод үнэ төлбөргүй шинжилгээний хариуг танилцуулан эрүүл ахуй, хүнсний аюулгүй байдлын талаас нь зөвлөгөө өгч ажиллажээ.
Шилдэг хоршоогоор Хан-Уул дүүргийн “Туул алтан хөрш” хоршоо шалгарч, тус үзэсгэлэнд 9 гишүүдээ зохион байгуулалт сайтай оролцуулж, 10 гаруй нэр төрлийн хүнсний ногоо тариалж 3 тн төмс, хүнсний ногоо, 0,5 тн тарвас, хулуу, 0.2 тн лооль, 7 төрлийн 500 гаруй шил нөөшилсөн бүтээгдэхүүн борлуулжээ.
Шилдэг аж ахуй нэгжээр Сүхбаатар дүүргийн “Бэлшэр-Эх” төрийн бус байгууллага тодорсон байна. Тус байгууллага 240 м2 хүлэмжийн талбайд 2 төрлийн хүнсний ногоо, 1 га талбайд 8 нэр төрлийн хүнсний ногоо тариалж, тус үзэсгэлэн худалдаанд 2 тн хүнсний ногоо, 8 нэр төрлийн 500 шил нөөшилсөн бүтээгдэхүүн борлуулан энэ удаагийн үзэсгэлэнд оролцжээ.
Шинэ сортын ногоо нутагшуулж тарьсан ногоочноор Сэлэнгэ аймгийн Мандал сумын ногоочин А.Отгончимэг, Шинэ сортын ногоо нутагшуулж тарьсан ногоочин-хүлэмжээр Сэлэнгэ аймгийн Шаамар сумын ногоочин С.Ширнэн,Хамгийн их олон нэр төрлийн ногоо тарьж, сурталчилсан ногоочноор Сэлэнгэ аймгийн Сүхбаатар сумын ногоочин Б.Цэцэгээ, Сэлэнгэ аймгийн Шаамар сумын ногоочин М.Ариунаа, Хамгийн их төмс борлуулсан ногоочноор Увс аймгийн Улаангом сумын ногоочин П.Янжин, Шилдэг жимсчнээр Өмнөговь аймгийн Булган сумын жимсчин Г.Энхтуяа тус тус шалгарчээ.
Нийслэлийн 5 дүүргийн 19 цэгт 8-р сарын 05-наас эхлэн хүнсний ногоо борлуулсан шилдэг ногоочноор “Намрын ногоон өдрүүд” үзэсгэлэн худалдаанд жил бүр оролцож 20 гаруй нэр төрлийн 10 тн ногоо Чингэлтэй дүүргийн Барилгачдын талбайд борлуулалт хийсэн Сэлэнгэ аймгийн Зүүнбүрэн сумын ногоочин Д.Алтанцэцэг, Баянзүрх дүүргийн “Дүнжингарав” худалдааны төвд 15 нэр төрлийн 10 тн ногоо борлуулсан Сэлэнгэ аймгийн Шаамар сумын ногоочин Б.Нандин-Эрдэнэ, Хан-Уул дүүргийн “Нome plaza” худалдааны төвд 13 нэр төрлийн хүнсний ногоо, 2 сортын тарвас нийт 3,6 сая төгрөгийн борлуулсан Сэлэнгэ аймгийн Мандал сумын ногоочин Р.Нармандах, Сонгинохайрхан дүүргийн худалдааны төвд 12 тн тарвас, амтат гуа борлуулсан Ховд аймгийн “Хөх цөцгийт хоршоо”, Баянзүрх дүүргийн “Sky” худалдааны төвд 22 нэр төрлийн 13 тн төмс, хүнсний ногоо борлуулсан Сэлэнгэ аймгийн Мандал сумын ногоочин Ч.Эрдэнэ-Сувд нар тус тус шалгарав.
Харин эмийн ургамлын борлуултаар Орхон аймгийн Оюут багийн иргэн Х.Ганцэцэг, зөгийн бал борлуултаар Сонгинохайрхан дүүргийн “Хурын шим” ХХК, Жимс, жимсгэнийн суулгац борлуулалтаар Увс аймгийн иргэн Ц.Батдэлэг, байгалийн жимс борлуулалтаар Завхан аймгийн Тосонцэнгэл сумын жимсчин О.Мөнхөө нар тэргүүлж, шилдгээр шалгарч өргөмжлөл цом гардан авсан юм.
“Намрын ногоон өдрүүд 2020” үзэсгэлэнд худалдаанд хүнсний салбараас оролцогчдоос шилдэг бүтээгдэхүүний шалгаруулалтыг хүнсний үйлдвэрлэлд дэвшилтэт техник, технологийг нэвтрүүлэх, импортыг орлох хүнсний шинэ бүтээгдэхүүний нэр төрөл болон экспортыг нэмэгдүүлэх, орон нутгийн үйлдвэрлэлийг дэмжих, харилцан туршлага солилцох нөхцөлийг бүрдүүлэх зорилгоор дараах төрлийн шилдэг бүтээгдэхүүнийг 5 гол шалгуур үзүүлэлтээр дүгнэж, шалгарууллаа. Үүнд:
- Хүүхдэд зориулсан хүнсний шилдэг бүтээгдэхүүнээр Витафит милк ХХК-ийн үйлдвэрлэсэн хүүхдийн Пороро сүү
- Шинэ нэр төрлийн шилдэг бүтээгдэхүүнээр Траст трейд ХХК-ийн үйлдвэрлэсэн Хотол нитритгүй шардаг зайдас
- Орон нутгийн хүнсний шилдэг бүтээгдэхүүнээр Архангай аймгийн “Бага рашаант” ХХК-ийн үйлдвэрлэсэн Амин чанар сүүний уургийн багц
- Хүнсний импортыг орлох шилдэг бүтээгдэхүүнээр Талх чихэр ХК-ийн Томбат жигнэмэгийн үйлдвэрийн Сарьдаг жигнэмэг
- Хүнсний экспортын шилдэг бүтээгдэхүүнээр Силк роуд мэжик ХХК-ийн үйлдвэрлэсэн Уулын бяслаг
- Дархлааг дэмжих шинэ бүтээгдэхүүнээр АПУ дэйри ХК-ийн үйлдвэрлэсэн Д дэмээр баяжуулсан сүү тус тус шалгарсан юм.
“Намрын ногоон өдрүүд-2020” үзэсгэлэн худалдаанд орон нутгаас иргэд хоршоо, нөхөрлөл, аж ахуйн нэгж идэвхитэй оролцсон “Орон нутгийн шилдэг санаачлага” бүтээгдэхүүнийн шагналын төрлийг шинээр бий болгож, Сүхбаатар аймгийн “Ариун хатавч” ХХК-ийн Хөмүүлийн сорс, Говьсүмбэр аймгийн “Дэлийн булаг” нөхөрлөлийн ааруулын цуглуулга шалгарсан байна.
Энэхүү үзэсгэлэн худалдаанд 15 аймгийн 31 сумын нийт 150 гаруй ногоочин, 3 аж ахуйн нэгж, 6 хоршоо, “Монгол ногоо”, ”Хоршоолсон хэлбэрээр хүнсний ногоо эрхлэх замаар өрхийн амьжиргааг сайжруулах”, “Адра” төсөл, ХААИС-ийн Агробиологийн их сургууль, ХААШУОҮНТ, Нийслэлийн мэргэжлийн хяналтын газар, Монголын хөдөөг шинэчлэхийн төлөө фермерүүдийн холбоо, Хүлэмжийн холбоо, Ногоочдын холбоо, Монголын Хүнсчдийн холбоо оролцлоо.
