Яармагийн замд гарцаар гарч явсан хоёр хүүхдийг мөргөөд, 5 настай бяцхан үр амиа алдчихлаа. Явган хүний гарцаар гарч явахад нь шүү дээ. 5 жилийн өмнө яг ийм хэрэг Яармагт гарч л байсан. Хүүхэд гэлтгүй том хүнийг ч гарцан дээр мөргөөд, амь насыг нь хохироосон хэрэг хэд хэд гарч байлаа. Яармагийн замд гарч байгаа осол аваар, мөргөлдөөн, шүргэлцээнийг тоолбол барагдахгүй. Тэр талаар бичвэл цаг, цаасны гарз. Харин гарцаар гарч яваа хүүхдийг мөргөж, амь насыг нь хохироох хэрэг дахин дахин гараад байгаад холбогдох албаныхан яагаад анхаарал тавихгүй байна вэ. Гарцан дээр явган зорчигчийг, хүүхдүүдийг мөргөж гэмтээж, амь насыг нь хохироогоод хүмүүст тооцох хариуцлагыг нэмэх болоогүй юу.
Цагдаагийн байгууллагаас өгч байгаа тоон мэдээгээр 202 оны эхний есөн сарын байдлаар гарцаар гарч байгаа хүүхдийг мөргөж гэмтээсэн 159 осол гарсан. Тэгвэл 2020 оны эхний хагас жилийн байдлаар гарсан нийт ослын 97.9 хувь нь жолоочийн буруутай үйлдлээс үүдэлтэй гэж байгаа. Ердөө 2.1 хувь нь л явган зорчигчийн буруутай үйлдэл байж. Энэ тоо баримтаас харахад, жолооч нар замын хөдөлгөөний дүрмийг биелүүлдэггүй нь харагдана. Тэр дундаа гарц дээр явган зорчигчид зам тавьж өгөх ёстой гэсэн Замын хөдөлгөөний дүрмийг авч хэлэлцдэггүй нь мэдрэгдэж байгаа юм. Өчигдөр Яармагийн замд гарц дээр зогсоод, бичлэг хийж байгаа иргэний бичлэгийг фэйсбүүкээс хүмүүс үзсэн байх. Хүүхэд, хүүхдээ тэвэрсэн ээж, өндөр настан гарцаар гарах гэж байхад зам тавьж өгч байгаа жолооч түй ч алга. Нэгдүгээр эгнээгээр зорчиж байгаа автобусны жолооч зогсоод зам тавьж өгч байхад хоёр, гуравдугаар эгнээнээр явж буй жолооч нараас зогсох хүн байдаггүй. Ийм байхад осол гарахгүй гээд яах юм бэ.
Жаахан сүржигнүүлэхэд, Яармагийн зам хар цэг болж хувирсан. Энэ замд хамгийн ноцтой гэсэн ослууд гарч байна. Арга ч үгүй биз. Явган хүнд зам тавьж өгдөггүй, 70, 80, цаашлаад 100 км цагийн хурдтай давхилдаж байхад ноцтой осол гарахгүй гээд яах билээ. Энэ замд дүрэм баримтлуулж хүчрэхгүй байгаа бол иргэдээ, хүүхдүүдээ хамгаалах чиглэлээр ажил хийгээч ээ, дарга нар аа. Хамгийн оновчтой шийдэл нь явган хүний гүүрэн гарц. Аргаа барахад 2, 3 газар гүүрэн юм уу нүхэн гарц барих хэрэгтэй байна. Хамгийн аюулгүй сонголт энэ. Улаанбаатарт байгаа явган хүний гүүрэн гарцуудаас хамгийн чамин хийцтэй, урт, том нь Сансарынх. Тэр зэргийн гүүрэн гарц барихад 850 орчим төгрөг зарцуулах юм билээ. Харин нүхэн гарцын дундаж өртөг 600 сая.
Уг нь өнгөрсөн оны сүүлчээр 10 байршилд гүүрэн болон нүхэн гарц барина гээд загвар зураг төслийн уралдаан зарлаад байсан. Тэр хүрээнд Хан-Уул дүүргийн 4-р хорооны нутаг дэвсгэрт буюу Нисэх, Яармагийн замд хоёр ч гүүрэн гарц барихаар төлөвлөсөн байсан. Нэгийг нь "Хүннү Молл" орчимд, нөгөөг Яармагийн хоёрдугаар буудал орчимд барих ёстой. Гэвч энэ ажлыг хэзээ хийж эхлэх юм, бүү мэд. Төр засгаас ямаанд, дарга нарт мөнгө өгөөд л байгаа. 1000 гаруй хүнтэй суманд соёлын төв барих төсөв байна. Гэтэл сайндаа л 1.6 тэрбум төгрөг гаргаад, Яармагийн замд хоёр гүүрэн гарц барьчих мөнгө олдохгүй л байв гэж.
Ингэж бичихээр сумын төвийнхнийг ялгаварлан гадуурхлаа гэж шаагилдах байлгүй. Үгүй дээ, төсвөө эрэмбэлж, юу хамгийн чухал вэ гэдгээ мэдрэх цаг болсон. Сумын төвд нь үзвэр үзэх хүнгүй болчихсон байхад соёлын төв барих хэрэгтэй юу. Эсвэл хамгийн ноцтой, аймшигтай, хүүхэд дайрч амийг хохироох осол их гарч буй газар гүүрэн болон нүхэн гарц барих нь чухал уу. 10 байршилдаа гүүрэн болон нүхэн гарцаа даруйхан барьчихвал сайн л байна. Үнэхээр мөнгөгүй, хэцүү байгаа бол ядаж Яармагт барих хоёр гүүрэн гарцаа нэн даруй хийчих л дээ.
Тэгээд Яармагийн замд галзуу солиотой юм шиг давхиадаг байдлыг зохицуулаа. Дахиад 2-3 байршилд камер суурилуулаад өгөөч ээ. Тэгэхгүй бол жолооч нар Яармагын зам руу гараад л багадаа л 80 км/ц-ын хурдтай давхих нь энүүхэнд. Нэгдүгээр буудлын орчимд байгаа камер, хурд хэмжигч дөхөхөөр 60 км/ц-тай явна. Хурд хэмжигч өнгөрөөгөөд л хаазаа гишгэдэг, зарим нь бараг 100 км/ц-тай давхиж байна. Энэ галзуурлыг арилгахгүй бол, наанадаж хурд сааруулагч тавихгүй бол бид осолд өртсөн хүүхэд, амиа алдсан үрсээ тоолсон хэвээрээ л сууна.
