Баянзүрх дүүргийн 26 дугаар хорооны нутаг дэвсгэрт байрлах "Саруул хотхон"-ы 11 давхараас 31 настай эмэгтэй унаж амиа алдсан харамсалтай хэрэг гарсан. Тодруулбал, энэ сарын 5-нд буюу даваа гаригийн үүрийн 04.00 цагт уг хэрэг гарсан юм. 

Энэ талаар ЦЕГ-ын Хэвлэл мэдээллийн төвөөс тодруулахад "Энэ сарын 5-ны өдөр өглөөний 04 цагт БЗД-ийн 26 дугаар хорооны нутаг дэвсгэрт 31 настай эмэгтэй өндрөөс унаж нас барсан гэмт хэргийн дуудлага мэдээлэл цагдаагийн байгууллагад бүртгэгдэж, цагдаагийн байгууллагаас мөрдөн шалгах ажиллагааг явуулж байна. Шалгалтын ажиллагааны урьдчилсан байдлаар талийгаач ам бүл 2 ээжийн хамт тухайн хаяг нь дээрээ оршиг суун амьдардаг. Тус хэргийг Баянзүрх дүүрэг дэх цагдаагийн газрын нэгдүгээр хэлтэс шалгаж байна" гэсэн юм. 

Зарим хэвлэлээр түүнийг гэр бүлийн хүчирхийллийн улмаас амиа хорлосон гэж мэдээлсэн ч урьдчилсан шалгалтаар гэр бүлийн хүчирхийллийн нөхцөл байдал тогтоогдоогүй байна. 

Эмэгтэй юуны учир амиа хорлох болов

Эх сурвалжийн мэдээлж буйгаар эмэгтэй нэгэн хувийн компанид орчуулагч хийдэг байжээ. Сүүлийн долоо хоног ажлын ачааллаас болж их ядарсан, стресстэй байсан гэнэ. Нас барахынх нь өмнөх орой нь ээж нь сэтгэл санаа нь тогтворгүй, стресстэй байгааг ажиглаж гадаа агаар салхинд гаръя хэмээн ихэд гуйжээ. Гэвч эмэгтэй "айгаад байна, гармааргүй байна" гээд ээжтэйгээ салхилаагүй байна. Улмаар тухайн шөнөө унтаж чадахгүй байн байн сэрж, тавгүй байсан тул ээж нь сахиж хоносон гэнэ. Ингээд үүрээр ээжийгээ нойлын өрөө орох хооронд цонхон дээрээ гараад зогссон байжээ. Түүнийг олж харсан ээж нь барьж авах гэсэн боловч амжилгүй цамцнаас нь зуураад гар алдсан байна. Сэтгэл санаа нь тогтворгүй, айсан бэргэсэн байсан тул ажил дээр нь ямар нэгэн асуудал байсан юм биш биз хэмээн хардаж байгаагаа ээж нь мэдүүлжээ. 

Түүний амиа хорлосон шалтгааныг тодруулахаар цагдаагийн байгууллага ажиллаж байна.