Энэ сарын 1-нээс эхлэн Төрийн 181 үйлчилгээг www.e-mongolia.mn веб портал болон гар утасны апп-наасаа цахимаар авах боломжтой болсон билээ. Тухайлбал, төрийн байгууллагууд цахим шилжилт хийснээр бичиг хэрэг, шуудангийн зардлаас жилдээ хамгийн багадаа 10 тэрбум төгрөгийг хэмнэх боломжтой аж. Харин иргэдийн хувьд 3.7 тэрбум төгрөгийн хэмнэх боломжтой юм байна. Улсын төсөв, хувь хүний санхүүг хэмнэхээс гадна мөнгөөр хэмжигдэхгүй үнэтэй цаг хугацааг энэхүү систем иргэн бүрт олгож байгаагаараа давуу талтай юм байна.
Энэ талаар УИХ-ын гишүүн Н.Учрал “Хууль, эрх зүйн орчныг боловсронгуй болгохоор ажиллаж байна. Аравдугаар сарын 1-нээс туршилтын хэлбэрээр эхлүүлсэн E-Mongolia иргэдийн дунд хамгийн эрэлт өндөртэй аппликэйшнээр нэрлэгдлээ. Одоогоор төрөөс иргэдэд үзүүлдэг 110 төрлийн үйлчилгээг шууд гар утас, компьютер зэрэг төхөөрөмжөөс авах боломжтой. Мөн өнгөрсөн тав хоногт Иргэний цахим үнэмлэхний сунгалт, гадаад пасспорт болон жолооны үнэмлэхний захиалгын үйлчилгээнүүд хамгийн өндөр хандалттай байлаа. Цаашид энэ тоог нэмэгдүүлж ойрын хугацаанд нийтлэг 181 төрлийн үйлчилгээг багтаах бөгөөд урт хугацаандаа төрөөс үзүүлдэг нийт 11,250 орчим үйлчилгээг бүгдийг нэг дор төвлөрүүлэхээр зорин ажиллаж байна. Хууль эрх зүйн хүрээнд мэдээллийн аюулгүй байдал, хадгалалт, хамгаалалтын асуудлаар холбогдох шинэчлэлт өөрчлөлтийг хийхээр бэлтгэж байна. Дашрамд дуулгахад, уг төслийг ь дэмжиж E-Mongolia аппликэйшнд нэвтрэхэд дата шаардахгүй, үнэгүй болгосон бүх үүрэн телефоны үйлчилгээ үзүүлэгч компаниуддаа баярлалаа. Хууль эрх зүйн орчин шийдэгдэж байна, төслийг Засгийн газар, холбогдох агентлаг хийгээд гүйцэтгэчихлээ. Одоо иргэдэд ашиглуулж хэвших, тэдний хэрэглээг нэмэгдүүлэхэд хэвлэл мэдээллийн байгууллага, үүрэн телефон харилцаа холбооны компаниуд энэ мэтчилэн манлайлал үзүүлж, нийгмийн хариуцлагаа хэрэгжүүлэн хамтран ажиллана гэдэгт итгэлтэй байна” гэлээ.
