Төрөөс баримталж байгаа бодлого, гаргасан тогтоол, шийдвэрийг зөрчиж, Засгийн газрыг буруу харагдуулдаг ганц нэг сайд, дарга нар байсаар байна. Тэр тусмаа 2020 оны сонгуульд үнэмлэхүй ялалт байгуулсан эрх баригчид өмнөх Засгийн газрын гаргасан алдаатай шийдвэр, зарим томилгоо, тогтоолоо эргэн харахгүй бол олон нийтэд буруу харагдсаар дуусах вий.
Тодотговол, Шадар сайд асан Ө.Энхтүвшин өөрийн багцад хамаарах Засгийн газрын тохируулагч агентлаг Стандарчилал хэмжил зүйн төвийн Дэд даргаар Б.Билгүүн гэх залууг ямар ч сонгон шалгаруулалтгүйгээр “өргөн” томилсон нь Төрийн албаны олон хууль тогтоомжийг зөрчиж байв. Гэтэл олон хууль тогтоомж зөрчин орж ирсэн түүнийг тус газрын даргын үүрэг гүйцэтгэгчээр дэвшүүлэн томилсон нь Төрийн албаны тухай хууль, тогтоомжийг дахин дахин зөрчиж, үл тоосон хэрэг боллоо. Тохируулагч агентлаг гэдэг бол хэн нэгэн танил тал, дарга сайдын халааснаас гарч ирсэн урилгагүй нөхөд удирдах байгууллага биш. Гэтэл “өргөж” тэтгэсэн мэргэжлийн бус, салбартаа туршлагажан ажиллаж байгаагүй залуус аливаа байгууллагын ажлыг унагадаг гашуун явдал ч энэ удаад давтагдаж байна.
Б.Билгүүний хувьд бусдаар дэмжүүлж “өргүүлж” орж ирсэн, мэргэжлийн бус туршлагагүй гэдгээ үйлдэл бүхнээрээ баталж байгаа нь харагдана.
Тухайлбал, Стандартчилал хэмжил зүйн салбарт хувцасаар жигдрэх, форм өмсөх ямар ч хууль дүрэм байхгүй. Гэтэл Б.Билгүүн даргын үүрэг гүйцэтгэгч болсон даруйд ажилчдаа дүрэмт хувцас хийлгэж төсвийн мөнгийг үрэн таран хийжээ. Яагаад гэхээр туршлагагүй, мэргэжлийн бус хүн энэ салбарт ямар ажил хийхээ сайн мэдэхгүй байгаа учраас арга ядаж байгаа хэрэг. Тиймээс Б.Билгүүнд энэ салбар ёстой л “Мэддэггүйд эрээн цоохор” харагдаж байгаа. Ийн арга ядахдаа “өргөж” тэтгэсэн хүмүүстээ ажил хийсэн болж харагдах гэж төсвийн мөнгийг үрэн таран хийж байгаа нь дэндүү харамсалтай.
Засгийн газраас үргүй зардлыг танаж, төсөвт сахилгатай хандахыг үүрэгдэж байхад “өргүүлсэн” нэг агентлагийн даргын түр орлон гүйцэтгэгч татвар төлөгчдийн мөнгийг ийнхүү салхинд хийсгэж байгааг Шадар сайд Я.Содбаатар анхааралдаа авах цаг нь нэгэнт болжээ. Хэрвээ энэ нөхөр “өрүүлсээр” яваад жинхэнэ дарга болвол энэ байгууллагын ажил ч унана, Засгийн газрын нэр хүнд ч тэр хэрээр унах нь ойлгомжтой. Шударга ёсны тугтай Засгийн газар арай ч ийм хууль бус зүйлийг дэмжихгүй байх гэдэгт найдаж байна.
Уг нь тус агентлагийг хариуцсан Шадар сайдын зөвлөхөөр С.Янжинсүрэн гэх эмэгтэй Ө.Энхтүвшингийн үеэс өнөөдрийг хүртэл ажиллаж ирсэн. Тэрээр эдийн засгийн байдал хүнд, цар тахлын урсгал дуусаагүй, засгаас бүхий л зардлыг хэмнэх тал дээр анхаарч байгаа. Ийм үед “Ямар ч шаардлагагүй хувцас хийж, үргүй зардал гаргах хэрэггүй” хэмээн зөвлөх ёстой атал эсрэгээрээ С.Янжинсүрэн шинэхэн форм өмссөн Б.Билгүүнтэй зургаа татуулсныг бодоход төсөв үрэн таран хийхийг зөвлөсөн мэт харагдана.
Я.Содбаатар сайд энэхүү хууль бус томилгоог хийгээгүй ч өмнөх сайдынхаа алдааг бататган давтаж яагаад ч болохгүй. Шударга ёсны тэмцэл дор хууль ёсны үйл ажиллагаа явуулж байгаа гэх У.Хүрэлсүхийн Засгийн газрыг олон нийтэд шударга бус, хууль бус харагдуулж байгаа энэ мэт томилгооноосоо салчихвал Засгийн газрын ажилд иргэд олон нийт ам сайтай л байна.
Ерөөсөө намыг ч бай, төрийг ч бай муухай харагдуулдаг зүйл бол хууль бус томилгоо, түүнийг тойрсон алдаа завхрал гэдгийг Ерөнхий сайд өөрөө чуулганы индэр дээрээс ч, Засгийн газрын хуралдааны танхимаас ч олон удаа хэлж байсан даа. Шадар сайдын багцад хамаарах агентлагын даргын үүрэг гүйцэтгэгч ийнхүү гаргасан шийдвэрийнх нь эсрэг харж, төсөв үрж явааг Ерөнхий сайд У.Хүрэлсүх мэдэхгүй байх нь аргагүй. Өдгөөгийн Шадар сайд Я.Содбаатар ч анзаараагүй байж болно. Гагцхүү та нарт дүн тавьдаг ард түмэн үүнийг харж шүүмжилж байгаа гэдгийг мартаж болохгүй. Тэр тусмаа стандартчилал хэмжил зүйн салбарт ажиллаж байгаа олон зуун алба хаагч үүнийг мэдэрч, харж, гайхаж зогсоо гэдгийг санах хэрэгтэй.
