УИХ-ын даргын хамт Баянхонгор аймгийн Эрдэнэцогт, Өлзийт суманд ажиллав. Хонгор нутгийн хувьд өвөлжилт хүндрэх өндөр эрсдэлтэй байгаа юм. Уулзсан хүмүүс ч энэ асуудлаар голчлон асууж байлаа. Холбогдох байгууллагуудаас гаргасан мэдээгээр өнгөрсөн зун Баянхонгор аймгийн нийт нутгийн 60 хувь нь гантай, 40 хувь нь гандуу байжээ. Үүнээс гадна бэлчээрийн даац 3-5 дахин хэтэрсэн, ургамлын гарц муудаж, хөрсний доройтол аюулын харанга дэлдэж байгаад сэтгэл зовниж байгаагаа малчид өгүүлж байв.
Аймгийн Хүнс, хөдөө аж ахуйн болон Мал эмнэлгийн газрын хамт олонтой уулзаж болзошгүй эрсдэлээс урьдчилан сэргийлэх, ажлаа шуурхай зохион байгуулах талаар ярилцлаа. Аймгийн өвөлжилт хүндрэх эрсдэлтэй байгаа 13 суманд тус бүр 30 тонн өвс ойрын өдрүүдэд хүргүүлэхээр болов. Үүнээс гадна отрын бүс, хил дагуух нутаг, өөр аймгуудад отроор мал өвөлжүүлэх ажлыг шуурхай зохион байгуулна.
Өвөлжилт хүндрэх эрсдэлтэй 6 аймгаас (Баянхонгор багтсан) 40 мянган тонн мах бэлтгэх шийдвэрийн хүрээнд 4 компани Баянхонгор аймгийн сумдаас 10 мянга гаруй мал худалдан авч, махыг нь дулааны аргаар боловсруулан экспортод гаргахаар ажиллаж байна.
Гамшиг зудын аюул ойрхон байгаа энэ цаг үед Засгийн газар, салбарын яамнаас гаргаж буй бодлого шийдвэрийг орон нутагтаа шуурхай хэрэгжүүлж, малчдаа дэмжиж ажиллахыг Баянхонгор аймгийн ХХАА-н болон Мал эмнэлгийн газрын хамт олонд захилаа.