Орон нутгийн сонгууль дуусч улстөрийн намуудын чансаа эрэмбэлэгдэж байна. Улстөрийн хүрээнд хоёр том нам гэгддэг МАН, АН хоёртой зуузай холбох хэмжээнд байсан МАХН-д иргэд итгэл үнэмшлээ үзүүлэхээс өнгөрчээ. Харин шинэ, залуу боловсон хүчнүүдийг дэмжиж.
Сурталчилгааны өдрүүдэд ширүүн өрсөлдөж байсан намуудаас АН-ыг УИХ-ын сонгуулиас хойш ялагдлаа хүлээн зөвшөөрч чадахгүй, уналтад орж, унтаа байдалд шилжлээ гэж олон нийт гоочилж байсан. Гэвч орон нутгийн иргэд тэдэнд боломж олгож байна.
Тодруулбал, энэ удаагийн сонгуулиар АН-аас нэр дэвшигчид НИТХ-д найман суудал авсан бол Архангай, Баянхонгор, Баян-Өлгий, ГовьАлтай, Дундговь, Өмнөговь, Сүхбаатар, Увс, Хөвсгөл аймагт олонх боллоо. Сонгогчид тэдэнд итгэл үзүүлсэн хэрэг. Хэдий аймгуудыг улаан, цэнхэрээр өнгөлж, намуудад хуваарилдаг ч энэ удаа УИХын сонгуулиар МАН-ын нэр дэвшигчдийг төрд илгээсэн аймгийн сонгогчид орон нутагтаа АН-ынханд итгэл үзүүлж байгаа нь тэдэнд олгосон боломж гэж харж болохоор.
“Саалиа бэлдэхээр саваа бэлд” гэж. АН дотоод зодооноо шийдвэрлэж чадвал тэднийг дэмждэг иргэд байгааг харуулсан орон нутгийн энэ сонгуулийн дараа бүхэлдээ шинэчлэгдэх болов уу гэх горьдлого ч олон нийтийн хүлээлт болов. Учир нь тус намынхан УИХ-ын сонгуульд ялагдал хүлээсний дараа С.Эрдэнэ намын даргын суудлаа өгсөн. Түүний орны хүнийг сонгохын өмнөх сунгаа явагдсан ч хугацааг нь хойшлуулсаар байгаа. Уг нь тэд асуудлаа яаравчлан шийдэж, цэгцэндээ орсон бол үүнээс ч илүү амжилт хүлээж байж гэдгээ одоо харж байгаа биз. Бурууг бусдаас бус өөрсдөөсөө олж харах, боломж олгосон сонгогчдодоо АН-ынхан талархах учиртай. Олгосон боломжийг олзуурхан хүлээн авч хүчтэй сөрөг хүчин байх чадвараа эргүүлэн олж авах нь улстөрийн намын хувьд "ТОМ БОЛОМЖ, СУРГАМЖ".
эх сурвалж: erennews.mn
