Шинээр байгуулагдсан УИХ-ын намрын чуулганаар нэн түрүүнд хэлэлцэж байгаа асуудал нь төсөв. Засгийн газраас өргөн барьсан төсөлд төсвийн орлогыг 11.8 их наяд, зарлагыг 13.9 их наяд тооцож, 2.2 их наядын буюу ДНБ-ий 5.1 хувьтай тэнцэхүйц алдагдалтай байхаар төлөвлөсөн байна. “Төсвийн алдагдал гэдэг харьцангуй ойлголт, яг ийм байна гэж шууд ойлгож болохгүй. Төсвийн төсөөлөл, төсөл гэдэг ийм байж магадгүй хэмээн тооцож байгаа л хэлбэр. Яг төсөв бүрдүүлэх явцад орлого нэмэгдэж болно. Эсвэл төсвийг янз бүрээр хэмнэж, алдагдал багасаж болдог. Тэр битгий ашигтай ч гарч болно гэж эдийн засагч Ч.Хашчулуун ярьсан. Тэгэхээр алдагдалд нэг их ач холбогдол өгөхөөсөө илүүтэй төсвийг зөв эрэмбэлдэг болоход л анхаарах хэрэгтэй байгааг эдийн засагчид хэлж байна.
2021 онд төсвийн хөрөнгөөр санхүүжүүлэх төсөл, арга хэмжээ, барилга байгууламжийн жагсаалтыг шүүж үзэхэд, сургууль, цэцэрлэг, дотуур байр, багшийн хөгжлийн ордны барилга шинээр барих, засах, өргөтгөл хийхэд зориулж 308 тэрбум, 214.5 сая төгрөгийг төсөвт тусгаж. Гэхдээ энэ хөрөнгө оруулалтын ихэнх нь өмнөх жилүүдийн он дамжсан барилгыг ашиглалтад оруулахад зарцуулагдахаар байна. Үндсэндээ 2018, 2019, 2020 онд эхэлсэн барилга, байшингуудыг дуусгах хөрөнгө оруулалт. Тэр дунд 2014 онд эхэлсэн цэцэрлэгийн барилга ч байх жишээтэй. Мөн 2023 онд дуусгахаар төлөвлөсөн барилга, байшин ч байна. Улаанбаатар хотод 2021 онд 17 орчим тэрбум төгрөгийн өртөг бүхий 7 сургуулийг ашиглалтад оруулна гэж төсвийн төсөлд тусгаж. Мөн бага сургууль цэцэрлэгийн цогцолбор болоод цэцэрлэгийн 19 барилгыг ашиглалтад оруулахаар тусгасан байна.
2021 онд Улаанбаатар хотод ашиглалтад орох сургуулиуд
Тэгвэл Зам, тээврийн хөгжлийн сайдын багцад 236.6 тэрбум төгрөг суулгаж өгснөөс 205.6 тэрбумыг авто зам барихад зарцуулах ажээ. Ихэнх замын ажлыг 2021 онд багтааж дуусгахаар төлөвлөж, хөрөнгө оруулалтыг төлөвлөж. Мэдээж 2022, 2023 онд дуусах замын ажлын эхлэлийг ирэх жил тавих аж. Харин Улаанбаатарт Зам, тээврийн хөгжлийн салбарын Улаанбаатар хотод хийгдэх хөрөнгө оруулалт 50.5 тэрбум төгрөг гэж төсөвт тусгаж өгсөн байна. Гэхдээ төсвийн төсөлд тусгаснаар 13 орчим км замыг 10 орчим тэрбум төгрөгөөр барих аж. Зам тээврийн салбарын хөрөнгө оруулалтын ихэнх нь хөдөө орон нутгийн зам засах, барихад зарцуулах нь.
2021 онд Улаанбаатар хотод барих замууд
Соёлын сайдын багцад 99.9 тэрбум төгрөгийг суулгаж өгч. Энэ мөнгөний 78 саяар нь барилга, байгууламж барина. Театр, музей, соёлын төв барина гэсэн үг. Төв аймгийн 4, Архангай аймгийн 3, Баянхонгор аймгийн 5, Завхан аймгийн 3 суманд соёл, спортын болон соёлын төв барихаар төсөвлөж. Гэх мэтчилэн аймаг болгонд 1-4 суманд соёлын төв барихаар болж. Ихэнх нь 2021-2022 онд ашиглалтад орно.
Тэгвэл 2021 онд музейд зориулсан хөрөнгө оруулалт нь 44.4 тэрбум төгрөг. 2022 онд ашиглалтад орох Байгалийн түүхийн музейн барилгад 20 тэрбумыг төсөвлөсөн бол Чингис хаан музейн үзмэрүүдийг сэргээн засварлах, сан хөмрөгийг нэмэгдүүлэхэд 10 тэрбумыг зарцуулах аж. Үлдсэн 14.4 тэрбумыг аймаг, суманд музейн барилга барихад зарцуулна. Нийтдээ 10 төсөлөөс 5 нь ирэх онд ашиглалтад орох юм байна.
Эрүүл мэндийн сайдын багцад 75.8 тэрбум төгрөг сууж. Түүнээс 57.2 тэрбумаар нь барилга байгууламж барина. Улаанбаатар хотод 2021 онд 10.5 тэрбум гаруй төгрөгийн өртөг бүхий эмнэлгийн барилга, өргөтгөл барихаар тусгажээ. Үлдсэн төсвийг хөдөө орон нутагт эмнэлэг барих, өргөтгөх, засварлахаад зарцуулах аж.
2021, 2022 онд Улаанбаатар ашиглалтад орох эмнэлгүүд
Ерөнхий сайдын багцад 31.8 тэрбум төгрөг суулгасан. Энэ мөнгө тэр чигээрээ БТСУХ-ны үйл ажиллагаанд зарцуулагдах юм байна. Тэр дундаа барилга, байгууламжид 31.2 тэрбум нь зарцуулагдах ажээ. Барилга, байгууламж гэдэг нь үндсэндээ спорт цогцолбор, спортын ордон, заал юм. Дунд нь хөлбөмбөгийн талбай, цэнгэлдэх хүрээлэн байгуулах гэх мэт бүтээн байгуулалт цөөн тоогоор багтсан. Улаанбаатар хотод Баянзүрх, Сүхбаатар, Хан-Уул дүүрэгт 1000 хүний суудалтай спорт цогцолбор барьж байгаа. Аль 2010 онд эхэлсэн энэхүү төслүүдэд зориулж тус бүртээ 50-хан сая төгрөгийн төсөв хуваарилж. Гэхдээ Сүхбаатар дүүргийн спорт цогцолборын төсөлд 1.5 тэрбумыг төсөвлөсөн. . Эдгээр цогцолборууд 2022 онд ашиглалтад орох юм байна.
