Гадаадын 800 иргэн Монголд бүгэж цахим гэмт хэрэг үйлдэж байсныг одоогоос нэг жилийн өмнө хууль хяналтынхан илрүүлж байв. Уг хэрэгт холбогдох шүүх хурал олон хоног үргэлжилсний эцэст өчигдөр 23:00 цагт шийдвэрээ танилцууллаа.

НПГ-аас Лью Тинхуа, Жун Хуа, Еэ Тин, Жан Хунчан, Вула, Ли Жиaсэнг, Ниу Жихэнг, Ю Жи, Жау Донлинг Пан Жин, Лю Жунвэй, Ян Гуй, Бай Жунлиан, Ли Янг, Лю Чианг гэсэн 15 хүнийг Эрүүгийн хуулийн 26.1-4.1 дэх хэсэгт заасан “Цахим мэдээлэлд хууль бусаар халдсан”, 18.6-3 дахь хэсгийн “Мөнгө угаах”, 20.3-1 дэх хэсэг дэх “Зохион байгуулалттай гэмт бүлэг байгуулсан, түүнд элссэн”, 17.3-3.1, 17.3-3.3 дахь хэсэгт заасан “Залилах” гэмт хэрэгт буруутган яллах дүгнэлт үйлдэж шүүхэд шилжүүлээд байсан.

Ингэснээр шүүгдэгч Лью Тинхуад холбогдох хэргийг тусгаарлан нэмэлт мөрдөн байцаалтад шилжүүлсэн бол хоёр шүүгдэгчид 12, бусад 12 шүүгдэгчийг есөн жил хаалттай хорих ангид ял эдлүүлэхээр боллоо. Шүүхийн шийдвэрээр гэмт хэрэгтнүүдийн гэмт хэрэг үйлдэхдээ ашигласан компьютер, олон тооны гар утас зэрэг эд зүйлсийг улсын орлогод оруулах нь зөв гэж үзжээ.

Хэргийг сануулбал, өнгөрсөн оны аравдугаар сарын 29-30-нд хууль хяналтынхан Сүхбаатар, Чингэлтэй, Баянзүрх дүүргийн нутагт үйл ажиллагаа явуулдаг зочид буудлуудаас БНХАУ-ын 818 иргэнийг саатуулсан юм. Тэд цахим төхөөрөмж ашиглан “Вичат”, “Телеграмм”, QQ зэрэг захидал харилцааны сүлжээнд “Жи-Мобайл”, “Скайтел”, “Юнител”-ээс авсан утасны олон дугаараараа хуурамч хаяг нээн, “МТ4” хэмээх өөрсдөө хувиргаж боловсруулсан платформд элсүүлэн хөрөнгийн зах зээлд арилжиж буй хувьцааг худалдах, худалдан авах ажиллагаанаас ашиг олж буй мэтээр зохиомол байдал бий болгон залилан мэхлэх гэмт хэрэг үйлдсэн нь тогтоогдсон юм.

Б.ЗАЯА

Шуурхай.мн