ЭМЯ-ны Төрийн захиргааны удирдлагын газрын дарга Б.Цогтбаатар, эм хангамжийн байгууллагын тусгай зөвшөөрлийн асуудал хариуцсан ахлах мэргэжилтэн Б.Болорчимэг, эрүүл мэндийн байгууллагын тусгай зөвшөөрлийн асуудал хариуцсан мэргэжилтэн Н.Чимэдлхам тэргүүтэй 26 хүнд холбогдох хэргийн урьдчилсан хэлэлцүүлгийн шүүх хуралдаан өнөөдөр Сүхбаатар дүүргийн Эрүүгийн хэргийн анхан шатны шүүхэд боллоо. 

Албан тушаалаа урвуулан ашиглаж авлига авсан үйлдэл дээрээ баригдсан ЭМЯ-ны удирдах эдгээр ажилтнууд, тэдний   өмгөөлөгч нарын зүгээс Эрүүгийн хэрэг хянан шийдвэрлэх тухай хуульд зааснаар хэргийг Хялбаршуулсан журмаар хянан шийдвэрлүүлэх хүсэлт гаргаад байсан юм. Шүүх бүрэлдэхүүн тэдний хүсэлтийг хүлээн авах боломжгүй гэж үзэн хэрэгсэхгүй болгожээ. Ингэснээр яллагдагч нарыг шүүхэд шилжүүлж, гэм буруугийн шүүх хуралдааныг жич товлохоор боллоо. 

Б.ЗАЯА 

Эх сурвалж: shuurhai.mn