УИХ-ын гишүүн Н.Алтанхуяг өнөөдөр сэтгүүлчдийн сонирхсон асуултад хариуллаа.
-Та АН-д буцаж элсэх үү. Гишүүнчлэлээ сэргээх үү. АН-ын даргын сунгаа ирэх сард явагдах гэж байна. Үүнд оролцох уу?
-Намайг АН-аас гарсан гэсэн буруу ойлголт яваад байна. Харин 2020 оны УИХ-ын сонгуулиар цөөхөн хэсэг нөхөд буюу удирдлагын түвшний цөөн хүмүүс, түүний цаана байгаа хүмүүс намайг намаас хасах шийдвэр гаргасан. Би арай хасаагүй байлгүй дээ. АН-ыг үүсгэн байгуулсан, 5-6 жил намын даргыг нь хийсэн шүү дээ гээд итгээгүй лавлах бичиг өгсөн. Гэтэл үнэн гэсэн бичиг өгсөн учраас би бие даан нэр дэвшсэн. Би намаас гараагүй, намайг намаас хассан тэр үеийн удирдлагын зарим хүмүүс гаргасан. Гэхдээ тэд энэ шийдвэрээ засч, залруулах байх гэж итгэж байгаа.
-Тантай хамт мөр зэрэгцэн явж байсан намын нөхдийг чинь шоронд хоричихлоо. Та үүнийг юу гэж харж байгаа вэ?
-Шүүх эхлээд гэрчээр асууна гэдэг юм. Тэгээд сэжигтнээр татна, яллагдагч болгоно. Би яг тэр замналаар явсан хүн шүү дээ. Намайг хэдэн ч хэрэгт гэрчээр дуудсан юм. АН-ын даргын сунгаа явагдахаар гурван хоногийн өмнө намайг шууд яллагдагчаар татаж, олон нийт Монгол даяар цоллосон. Тэр үед үнэхээр том хонгил ажиллаж байсан. Гэхдээ бүх хүн дээр ажиллахгүй. Цаашдаа ажиллаж мэдэх, олон юм ярих, тодорхой хэмжээний мэдээлэлтэй, эсвэл АН-ын дарга болох, Ерөнхийлөгчид өрсөлдөөд байж мэдэх цөөхөн хүмүүсийн эсрэг хонгил ажилласан. Нэг нь над дээр. Нэг нь Ерөнхийлөгч Х.Баттулга дээр ажилласан. Одоогийн нөхцөл байдлыг би үнэлж хэлж мэдэхгүй байна. Гэхдээ нэг юмыг баталгаатай хэлье. Өнөөдөр шударга ёсны хонгил нурсан уу гэвэл нураагүй. Толгойг нь сольсон. Их бие, хөл гар хавиар зөндөө юм байх шиг байна.
АН-ын байрыг дуудлага худалдаа нэрээр 7 тэрбумаар Улаанбаатар банкинд зарсан
-Та АН-ын дарга байсан хүн. Танай нам одоо сөрөг хүчний үүргээ биелүүлж чадахгүй. Намын ч байргүй хэцүү байдалтай байна гэнэ?
-АН одоо УИХ-д 11 суудалтай. Үүний 4 нь хуучин, 7 нь шинэ гишүүд. Тэгэхээр шинэдэж байгаа байх. Удахгүй чангарна гэж итгэж байна. Н.Алтанхуяг намын дарга байхдаа АН-ын байрыг зарсан гэдгийг С.Эрдэнэ гаргаж тавьсан. Гэтэл би намын байр зараагүй. Намын Гүйцэтгэх зөвлөл хуралдаад шийдвэр гаргаад, тэр байшинг зарсан. Харин хожим надтай холбоод байхаар нь материалыг нь авч үзэхэд Улаанбаатар банк авсан байна билээ. Би Ерөнхий сайд байсан хүн юун намын байр зарах манатай. Дуудлага худалдаа нэрээр Улаанбаатар банкинд зарсан байдаг юм. 7 орчим тэрбумаар зарсан. Тэр мөнгийг юунд зарсан, үрсэн гээд одоо асуудал үүсч байгаа. Та бүхэн сурвалжлаад үзээрэй. Манай нам байргүй биш, байртай. Төв шуудангийн урд хоёр давхар. Би тэнд байсан. Гэхдээ намын байрны том, жижиг огт хамаагүй. Манай нам тэр жижиг байранд байхдаа л ялалт байгуулж байсан. Байр саваа голохоосоо илүүтэй үнэтэй цэнэтэй зүйлийнхээ төлөө, ард түмнийхээ төлөө цохилох зүрхтэй байхад нам байртай байна уу үгүй юу хамаагүй.
Ч.Сайханбилэг захидал бичиж суухаар эх орондоо ирэх хэрэгтэй
-Ерөнхийлөгч асан Ц.Элбэгдорж намдаа буцаж ирлээ. Энэ хүн ирсэнээр нам шинэчлэгдэх үү. Та хэрхэн харж байна вэ. Ц.Элбэгдорж намаа авъя гэвэл та яах вэ?
-Улс орныг дампууруулж, Монгол Улсын ирээдүйг балласан хүний нэг нь яах аргагүй Ц.Элбэгдорж. Би хэн нэгэн хүнтэй сөргөлддөг хүн биш. Үнэт зүйлийнхээ төлөө алалцдаг хүн.
-Ерөнхий сайд асан Ч.Сайханбилэг АНУ-аас захиа илгээхдээ танд нэлээн хатуу үг дайсан. Та энэхүү захидлын асуудалд юу хэлэх вэ?
-Ч.Сайханбилэг захидал бичиж суухаар энд хүрээд ирэх хэрэгтэй. Би эх орноосоо урвадаггүй. Анд нөхдийн харилцаа анд нөхдийн харилцаа. Эх орноо худалдах гэдэгтэй би эвлэрч чадахгүй.
-Та ирэх сард болох АН-ынхаа хуралд оролцох уу. Та намын даргад нэр дэвших үү?
-Би АН-аас өөрөө гараагүй. Намайг хассан. Хэрвээ хассан бичгээ хүчингүй болговол би хуралдаа орно. Ер нь ч тэгээд намын гишүүд дэмжиж барьвал юу ч хийсэн болно. Би энэ намд их олон ажилласан.
-Ерөнхийлөгчийн сонгууль хэдийнээ эхэлжээ. Одоогийн Ерөнхийлөгч дахин үзэх боломжтой юу?
-АН зохион байгуулалтаа хийгээд явах байх. Хэн нэр дэвшихээс шалтгаалж, дэмжих эсэхээ шийднэ. Мэдээж нэг хүн нэр дэвших л байх.
Би чинь жигүүрхэн, мигүүрхэн байгуулаад явдаг хүн биш л дээ
-МАНАН бүлэглэл нурсан уу?
-Нураагүй ээ, нураагүй. Эрдэнэтийн 49 хувийг яана гэнэ үү. 49 хувийг төр авсан юм байх гэсэн чинь хэлэлцээ хийнэ ч гэх шиг. Хулгайч дээрэмчинтэй хэлэлцээ хийдэг төр байж болох уу. Би нураагүй гэж харж байгаа. Нөгөө тал дээр хууль хяналтын байгууллага дээр ч бүрэн гүйцэт цэвэрлэгээ хийгдээгүй л байна.
-Та намаа шинэчлэх гээд фракц байгуулаад байсан. Тэр юу болсон бэ?
-Би чинь жигүүрхэн, мигүүрхэн байгуулаад явдаг хүн биш л дээ. АН гэж том нам байгаа. Мундаг нам. Их олон хүсэл, их олон хүний бадрангуй тэмүүлэл төвлөрсөн нам.
