"Петровис" компанийн үүсгэн байгуулагч Ж.Оюунгэрэл хүнд өвчний улмаас таалал төгсжээ. Тэрбээр өвчний улмаас Германд эмчлүүлж байгаад ийнхүү эх орондоо ирж чадалгүй нас барсан байна. Түүний ар гэр, төрөл төрөгсөд, найз нөхдөд гүн эмгэнэл илэрхийлж байна.
Жанчив Оюунгэрэл
Нефтийн инженер, 1955 онд төрсөн
Боловсрол:
ЗХУ /хуучин нэрээр/-д Москва хотноо Нефть, хий, химийн аж үйлдвэрийн дээд сургууль төгсчээ. Нефтийн инженер, эдийн засагч мэргэжилтэй.
Ажлын түүх:
Зах зээлийн харилцаанд шилжсэнээс хойш "НИК" компани, "Петровис" компанийн ерөнхий захирлаар ажиллаж иржээ. НИК-д байхдаа тус компанийн үйл ажиллагааг зах зээлийн эдийн засгийн хуульд зохицуулан тууштай өөрчлөлт хийж чадсанаар тогтвортой амжилтанд хүрч, оршин тогтнож чадсан байна. Хувийн өмчийн "Петровис" ХХК байгуулан богино хугацаанд өрсөлдөх чадвартай томоохон аж ахуйн нэгж болгосноороо бизнесийн салбарын шилдэг удирдагчдын нэг мөнөө харуулсан байна. Бизнесийн томоохон байгууллагыг удирдахын сацуу хүүхэд, залуучуудын төрийн ба төрийн бус байгууллагад сонгуульт үүргүүдийг идэвхтэй гүйцэтгэж буй олон нийтийн нэр хүндтэй шилдэг сэхээтэн ажээ.
Гавъяа шагнал:
Монголын менежментийн холбооны 1995 оны тэргүүний менежер, Монголын худалдаа аж үйлдвэрийн танхимын 1998 оны шилдэг эмэгтэй захирал, 1999 оны шилдэг хатагтай өргөмжлөл хүртжээ. Худалдаа үйлдвэрлэлийн "Петровис" ХХК-ийн ерөнхий захирал байхдаа Худалдааны гавъяат ажилтан цол тэмдгээр шагнагдсан.
