Одоогоос жил гаруйн өмнө буюу 2019 оны гуравдугаар сарын 13-нд Эрдэнэт үйлдвэрт Засгийн газраас онцгой дэглэм тогтоож байв. ЗГХЭГ-ын дарга Л.Оюун-Эрдэнэ онцгой дэглэмийн талаар тайлбарлахдаа “Зүүн өмнөд Азид түгээмэл ашиглагддаг мөнгө угаалтын түгээмэл систем. Дэлхийн 13 улсад энэ систем ажиглагддаг жижиг луйврын асуудал. Тиймээс үүнд сүржигнээд байх зүйлгүй. Хууль хэрэгждэг улсад энэ асуудал аль эрт шийдэгдчихсэн байх байсан.  Аливаа асуудлыг эцэслэн мухарлаж, зөв ойлголт өгч явах нь Засгийн газрын үүрэг. Мөн Засгийн газрын хуулиар олгогдсон эрх нь гэмт хэрэгтэй тэмцэх явдал. Засгийн газар өөрөөс шалтгаалах зүйлээ хуулийн хүрээнд авч хэрэгжүүлж ажиллаж байна” гэж байв.

Нэг ёсондоо Эрдэнэт үйлдвэр мөнгө угаах том субьект болчихсон гэдгийг төр засгийн хүрээнд албан ёсоор тогтоож,  зогсоохыг оролдсон арга хэмжээ.

Монгол Улсын ганц саалийн үнээ гэгддэг Эрдэнэт үйлдвэр улс төрийн өндөр албан тушаалтнууд, эрх мэдэлтэй хүмүүст ч саалийн үнээ байсаар ирсэн. Бараагаа шахдаг, бараа ажил үйлчилгээний хөлс хэдэн зуу дахин нэмэгдсэн өртөгтэй худалддаг зөрчлүүд Эрдэнэтээр нэг бий.

Уг нь жилийн өмнө Эрдэнэт үйлдвэрт тогтоосон онцгой дэглэмийг санхүү төсвийг замбараагүй байдлыг цэгцэлнэ гэж ойлгож байлаа. Засгийн газрын зүгээс ч ингэж мэдэгдсэн.

Тэгвэл онцгой дэглэм төсвийн мөнгөөр тоглох том халхавч болжээ. Үүний илрэл бол сүүлийн үед шилээ даран ил болж байгаа Эрдэнэт үйлдвэртэй холбоотой зөрчлүүд.

Экс Ерөнхийлөгч Н.Багабандийн шахаа ба 25 сая төгрөгийн “Титэм үг”

Эрдэнэт Үйлдвэр ТӨҮГ-ын төсвийн зарцуулалтыг харуулж буй шилэн дансны вэб хуудаст Эрдэнэт үйлдвэрээс Ерөнхийлөгч асан Н.Багабандийн “Титэм үг” номыг 25.000.000 төгрөгөөр 1000 ширхэгийг авсан баримтыг уншигч та харж байна.

Захирал Х.Бадамсүрэнгийн эцгийн үүргийг Эрдэнэт үйлдвэр гүйцэтгэж байна

Эрдэнэт үйлдвэрийн захирал Х.Бадамсүрэн охиныхоо сургалтын төлбөрт болох 102 сая төгрөгийг Канадын Торонтогийн их сургуульд шилжүүлсэн баримт олон нийтэд ил болсон. Мөн 8.3 сая төгрөгийн мөнгөн аяга, 20 сая төгрөгийн үнэ бүхий массажны сандлыг үйлдвэрийн санхүүгээс гарсан байх юм.

Мөн тус үйлдвэрийн Хамтын ажиллагаа, нийгмийн асуудал хариуцсан орлогч захирал Д.Дэлгэрбаяр "Эмчилгээний зардал" гэж 219,063,796₮ үйлдвэрээс гаргуулан авсан баримт ч ил байна.

Түүнчлэн "Эрдэнэт" үйлдвэр Орхон аймагтай хамтран ажиллах гэрээг 2 тэрбум төгрөгөөр байгуулсан байна.  "Булган Инноваци" ТББ-тай 700 сая төгрөгөөр хамтран ажиллах гэрээ байгуулжээ. Монголын хүүхэд залуучуудын хөгжлийн сан ТББ-тай 200 сая төгрөгөөр хамтран ажиллах гэрээ байгуулсан байна. "Эрдэнэт үйлдвэр" нь Үйлдвэрчний эвлэлийн зөвлөлтэй бөгөөд тус зөвлөлийн гишүүдийн татвар хэмээн 99 сая төгрөг гаргажээ. "Эрдэнэт" үйлдвэрийн 40 жилийн ойн арга хэмжээний үеэр Италийн FOSRL компаниар  27 сая 727 мянган төгрөгөөр брэндинг хийлгэжээ.

Б.ЗАЯА

Эх сурвалж: shuurhai.mn