Ковид 19 вирусийн халдвартай бүс нутгаас ирсэн иргэн тусгаарлалтад байх үедээ оргосон явдал гарчээ. Энэ талаар Засгийн газрын хуралдааны мэдээллийг Шадар сайд Я.Содбаатар олон нийтэд өгөх үеэр хөндлөө.
Тэрээр энэ сарын 2-ны өдөр Сэлэнгэ аймгийн нэгдсэн эмнэлэгт тусгаарлагдаж байгаад оргожээ. Уг иргэн тусгаарлалтад ирээд 19 хонож байжээ. Өмнө нь ОХУ-аас Монголын хил рүү 633 тэмдэгтээр хил зөрчиж ОХУ-ын талд баригдаад, хилийн солилцоогоор Монголын талд хүлээлгэж өгаад байсан хүн байна.
Тухайн иргэнийг оргосон даруйд тус аймгийн төвөөс 19 километрийн зай дахь Хараагийн гол гэдэг газраас албаны хүмүүс барьж, эргээд тусгаарлалтад оруулжээ. Тус иргэний шинжилгээний хариу бүгд сөрөг гарч байсан гэдгийг Шадар сайд мэдэгдлээ.
Б.ЗАЯА
Эх сурвалж: shuurhai.mn
