УОК-оос ээлжит мэдээллээ хийлээ. УОК-ын дарга, Шадар сайд Я.Содбаатар "Улаанбаатар хотноо коронавирусийн халдвар илэрсэн хоёр тохиолдол илэрсэн. Тиймээс энэхүү хоёр хүнтэй уулзсан, хавьтал болсон, орсон гарсан газрыг нь тогтоохоор Улаанбаатарт гурван хоногийн хөл хорио тогтоогоод байна. Одоо коронавирусээс урьдчилан сэргийлэх ажил дуусч, дотоодод илэрсэн учраас цар тахалтай нүүр тулахаар болж байна. Гэхдээ ард иргэд сандарч, үймж гүймээргүй байна.
Хамтдаа тайван байж бид цар тахлын ард гарах болно" гэв
Эрүүл мэндийн сайд Т.Мөнхсайхан "Аравдугаар сарын 14-нд Алтанбулагийн боомтоор гарч ирсэн Монгол жолоочоос халдвар илрээд байна. Тэрбээр хилээр орж ирээд Сэлэнгэд шинжилгээ өгөхөд сөрөг гарсан тул Энхсаран сувилалд шилжүүлсэн. Тусгаарлагдах хугацаанд 3 удаа шинжилгээ авахад сөрөг гарч байсан. Ингээд гарсных нь дараа тандалтын зорилгоор шинжилгээ авахад эхнэрээ нь болон өөрөөс нь халдвар илэрсэн. Тиймээс ХӨСҮТ-д тусгаарлаад байна.
Одоогийн байдлаар 24 хавьтагчийг тогтоогоод ХӨСҮТ-д тусгаарлан, эхний шинжилгээг аваад байна.
Хоёр цагийн дараа эхний шинжилгээний хариу гарна.
Гол нь ард иргэд амар тайван байж, амны хаалтаа зүүж, гараа угааж, хүн хоорондын зай барин урьдчилан сэргийлэх тал дээрээ сайн ажилламаар байна. Эмнэлгийн байгууллагыг болж өгвөл битгий зориорой" гэв.
-Тусгаарлалтаас гарсан иргэнийг халдвар авсныг яаж илрүүлсэн юм бэ. Гэр бүлийнхнийх нь талаар мэдээлэл өгөөч?
-Тусгаарлах байрнаас гарсан иргэд тандалтад байдаг. Тэрбээр эхнэр хоёр хүүхдийн хамт амьдардаг. Мөн хашаанд нь аав ээж нь байдаг. Эдгээр бүх хүмүүсийг ХӨСҮТ-д тусгаарласан. Хүүхдүүд нь 1, 4 настай хоёр хүүхэд бий.
