Дэлхий дахиныг нөмөрсөн цар тахал Монгол Улсад дотоодод бүртгэгдсэнээс болж улсын хэмжээнд өндөржүүлсэн бэлэн байдалд шилжээд байгаа билээ. Гамшгийн тухай хуулийн дагуу өчигдөр 23:00 цагаас эхлэн авто машин, хүний хөдөлгөөнийг хориглосон.
Дүрэм журмыг хэрхэн биелүүлж байгааг сурвалжиллаа. Сонгинохайрхан дүүргийн нутаг дэвсгэр 18 дугаар хороо Таван шарын призер гэж нэрлэгддэг хэсэгт гурван замын уулзвартай. Орон нутгаас орж ирдэг уулзвар, Тахилт, Орбит чиглэлийн зам төв зам руу нийлдэг хэсэг. Энэ хэсэг дээр өчигдрөөс эхлэн цагдаа нар гарч хөдөлгөөнийг зохицуулж байна. Төв зам руу нийтийн тээвэр болон хүнсний хүргэлтийн ачааны машинууд л нэвтрэх эрхтэй аж. Цагдаа, онцгой, эмнэлгийн онцгой албан хаагчдад чөлөөтэй.
Харин бусад тохиолдолд иргэд авто машинаар нэвтрэх боломжгүй юм байна. Цагдаа нар иргэдэд журмын талаар тайлбарлан буцах дохио өгсөөр байх аж. Зарим жолооч нар үүргээ биелүүлж буцаж байгаа боловч төв зам руу нэвтрэхийг оролдох жолооч цөөнгүй гарч байна.
Төв зам дагуу замын уулзвар, эргэлт, дохио бүр дээр зам хааж цагдаа нар зогсчээ. Төв эргэх эргэлт, уулзвар бүр дээр багагүй маргаан өрнөж байна. Цагдаа дуу өсгөгчөөр хэчнээн тайлбарлавч амны хаалтгүйгээр машинаасаа гарч ирэн маргалдах жолооч ч таарлаа.
Нийтийн тээврийн автобуснууд журмын дагуу өглөө 06:00-10:00 хүртэл явж байгаа учраас өдрийн цагаар төв замаар нийтийн тээврийн ямар ч хөдөлгөөн алга. Тиймээс иргэд шаардлагатай тохиолдолд явган алхаж зах дэлгүүр, эмнэлэгт хүрч байна.
Цагдаа нар замын хамгаалтад зогсохоос гадна явган хүний зам дагуу 50 метр тутамд хэд, хэдээр эргүүлд гарч байна. Явганаар явж буй иргэдээс ямар зорилготой явж буйг лавлаж, амны хаалт зүүхийг сануулж байлаа. Амны хаалтгүй иргэдэд хувиасаа шинэ амны хаалт гаргаж өгч байгаа цагдаа ч харагдлаа. Иргэд ч үүргээ биелүүлж амны хаалтаа хүн бүр зүүцгээжээ. Иргэд голдуу зах худалдааны төв рүү хүнсээ цуглуулахаар явж байв. Учир нь нэгнээсээ зах ажиллаж байгааг лавлаж харагдана.
Өндөржүүлсэн бэлэн байдалд Монгол Улс бэлтгэлтэй байна. Иргэд үүргээ сайн биелүүлж, онцгой албаны албан хаагчид ч идэвх зүтгэлтэй ажилласаар байна.
Эх сурвалж: shuurhai.mn Б.ЗАЯА
